Kocha Djibouti U20 Alengwa na Vijana Wake CECAFA: “Tumerudi na Uzoefu na Somo”
TIMU ya Taifa ya vijana chini ya miaka 20 ya Djibouti imeaga rasmi mashindano ya CECAFA U-20 baada ya kupoteza michezo yake yote miwili ya Kundi B. Licha ya kuondoka mikono mitupu, kocha mkuu wa timu hiyo, Abdirahman Ali Abubakar, amesema safari yao haijawa ya bure kwani wameondoka na vitu viwili muhimu: uzoefu na somo kwa ajili ya siku zijazo.
Djibouti ilianza vibaya mashindano hayo kwa kupokea kichapo cha mabao 4-1 kutoka kwa Uganda, kabla ya kuchezea kipigo kingine cha mabao 3-0 dhidi ya Sudan. Matokeo hayo yaliifanya timu hiyo kumaliza safari yake mapema bila kukusanya pointi yoyote katika kundi hilo.
Akizungumzia matokeo hayo, Abubakar amebainisha kuwa kuondolewa kwao hakumaanishi mwisho wa safari ya kikosi chake, bali imekuwa nafasi nzuri ya kuwajenga vijana wake kisoka.
“Wachezaji wetu wengi ni wa umri wa chini ya miaka 16 na 17 (U-16 na U-17), tofauti na wapinzani wetu ambao wengi wao tayari wanacheza ligi kuu. Hii ilikuwa fursa ya kipekee kwa vijana wetu kujifunza na kupata uzoefu wa michezo ya ushindani wa kiwango cha juu,” amesema Abubakar.
Kocha huyo alitolea mfano kikosi cha Uganda, akieleza kuwa sehemu kubwa ya wachezaji wao wana uzoefu wa kucheza Ligi Kuu, jambo lililowapa faida kubwa uwanjani ikilinganishwa na kikosi chake ambacho bado kipo kwenye hatua za mwanzo za maendeleo.
Abubakar amesisitiza kuwa Djibouti itatumia masomo yote iliyoyapata katika mashindano haya ya CECAFA kuendelea kuwalea na kuwajenga vijana hao ili kuandaa timu imara kwa ajili ya mashindano yajayo.
