Simba Queens Mabingwa Ngao Ya Jamii, Mnunka Aimaliza JKT — Taji La Pili Hilo

Simba Queens imeanza msimu mpya na ndoo mkononi baada ya kuifunga JKT Queens bao 1-0 na kutwaa Ngao ya Jamii 2026 katika fainali iliyopigwa Uwanja wa KMC Complex, Mwenge.

Haikuwa fainali ya nafasi nyingi wala mabao mengi, lakini ilikuwa mechi ya presha, nguvu na kusubiri kosa moja. Simba ililazimika kuwa na subira hadi kipindi cha pili ndipo mchezo ukafunguka na Aisha Mnunka akawa shujaa wa Wanamsimbazi.

Maseke Nyekundu, Mnunka Akamaliza Kazi

Mchezo uliendelea kuwa mgumu hadi dakika ya 59, wakati mlinzi wa JKT Queens Ester Maseke alipomvuta Aisha Mnunka na kuonyeshwa kadi nyekundu. JKT ikabaki na wachezaji 10, na Simba haikuchukua muda mrefu kutumia faida hiyo.

Dakika ya 62 Mary Siyame alitoa pasi iliyomkuta Mnunka katika nafasi nzuri, mshambuliaji huyo akamalizia kwa umakini na kuandika bao pekee la mchezo. JKT ilijaribu kurejea, lakini Simba ikasimamia uongozi wake hadi filimbi ya mwisho.

Simba Queens Wamelipa Kisasi

Ushindi huu una ladha nyingine kwa Simba Queens. Msimu uliopita JKT Queens ndiyo iliyowafunga mabao 2-1 kwenye fainali ya Ngao ya Jamii na kubeba taji, lakini safari hii Simba imerudisha hesabu mezani na kuondoka na kombe.

Ndani ya siku chache Simba imeipiga Yanga Princess 3-0 kwenye nusu fainali, halafu ikamfunga JKT Queens 1-0 kwenye fainali. Kwa timu inayotaka kuingia msimu mpya ikiwa na saikolojia ya ubingwa, huo ni mwanzo unaotuma ujumbe mzito.

Hii Ni Ngao Ya Pili Kwa Simba Queens

Ngao ya Jamii kwa Wanawake ilianza mwaka 2023, na Simba Queens ndiyo ilikuwa bingwa wa kwanza baada ya kuifunga JKT Queens kwa mikwaju ya penalti 5-4 kufuatia sare ya 1-1.

Mwaka 2024 JKT Queens ikachukua taji, ikarudia tena mwaka 2025, lakini Simba imerudi kileleni mwaka 2026. Hivyo baada ya matoleo manne, Simba Queens na JKT Queens sasa kila moja ina mataji mawili ya Ngao ya Jamii.

2023: Simba Queens
2024: JKT Queens
2025: JKT Queens
2026: Simba Queens

Kikosi Kilichoanza Simba Queens

Kocha Mussa Hassan Mgosi alianza na: Ruth Aturo; Asha Omary, Zaina Nandede, Fatuma Isa, Ruth Ingosi; Vivian Corazone, Fasila Adhiambo, Elizabeth Joseph, Senaf Demise, Mary Siyame na Aisha Mnunka.

Benchi lilikuwa na Janeth Shija, Esther Mayala, Neema Mtunzi, Dotto Evarist, Mabinty Camara, Shelda Boniface, Elizabeth Nashon, Janeth Nyagali na Violeth Nicholas.

Ushindi Huu Una Maana Gani Kuelekea Msimu Mpya?

Kwanza, Simba imepata confidence ya mechi kubwa. Kupita Yanga kwa mabao 3-0 na kisha kuimaliza JKT kwenye fainali ni aina ya matokeo yanayojenga imani ndani ya dressing room kwamba timu inaweza kushinda hata mchezo unapokuwa mgumu na nafasi zikiwa chache.

Pili, safu ya ulinzi imepitia mechi mbili za Ngao bila kuruhusu bao. Kwa timu inayotetea hadhi yake kwenye Ligi Kuu ya Wanawake, hiyo ni foundation nzuri kabla ya ratiba ndefu kuanza.

Tatu, huu ni ushindi muhimu kwa Mussa Mgosi baada ya Simba Queens kutoka kwenye kampeni ya CECAFA ambayo haikwenda kama walivyotaka. Kocha mwenyewe alikuwa amesema walitumia kipindi hicho kufanya marekebisho; sasa ushindi wa Ngao unampa ushahidi wa kwanza kwamba baadhi ya marekebisho hayo yanaanza kuonekana.

Na mwisho, Mnunka ameanza msimu kwa kuamua fainali. Kwa mshambuliaji ambaye anatarajiwa kubeba sehemu kubwa ya mabao ya timu, kufunga bao la kombe mapema namna hii ni habari nzuri kwa Simba.

Ngao ya Jamii haiamui bingwa wa ligi, lakini namna Simba Queens ilivyoipata inaonyesha jambo moja: mabingwa hao wa Ligi Kuu hawajaanza msimu kwa mazoezi. Wameanza kwa kombe.

Soma Hapa: Fainali Ngao Ya Jamii Wanawake: JKT Queens Vs Simba Queens