CEO Wa Simba Awasha Moto: Atoa Kauli Nzito Dabi ya Kariakoo Na Kimataifa!
Mtendaji Mkuu (CEO) wa Simba SC, Zubeda Kasuru, amebainisha kuwa ubingwa wa Ngao ya Jamii uliotwaliwa na kikosi cha wanawake, Simba Queens, umeleta hamasa na morali kubwa ndani ya klabu hiyo kuelekea mechi ngumu za mwezi huu wa Oktoba.
Simba Queens walitwaa taji hilo baada ya kuichapa JKT Queens bao 1-0, matokeo ambayo Kasuru anaamini yamejenga hali chanya na kujiamini kwa kikosi cha wakubwa (Senior Team) kinachojiandaa na majukumu mazito ya ligi na kimataifa.
Maandalizi ya Dabi ya Kariakoo
Akizungumzia maendeleo ya timu, CEO Kasuru ameeleza kuwa anaendelea vyema na programu ya klabu akiwa nchini Afrika Kusini, na anatarajiwa kurejea nchini kesho ili kuungana na timu katika maandalizi ya mwisho kuelekea pambano la Dabi ya Kariakoo dhidi ya Yanga SC, linalotarajiwa kupigwa Oktoba 10.
“Ninaendelea vizuri na timu yetu, natarajia kurejea nchini kesho na baada ya hapo programu nyingine ya timu itaendelea. Naamini matokeo mazuri tutayapata katika siku hizi zinazokuja,” alisema Kasuru.
Chachu Kwenye Michuano ya Kimataifa
Mbali na Dabi ya Kariakoo, Kasuru aliongeza kuwa matokeo chanya ya Simba Queens yatakuwa chachu ya ushindi sio tu kwenye Ligi Kuu, bali pia katika michuano ya kimataifa ambayo Simba SC inashiriki mwezi huu.
“Mashindano ya Ngao ya Jamii kwa wanawake yataongeza morali na hamasa kwa Senior Team ili ifanye vizuri, sio kwenye Dabi pekee, bali hata kwenye michuano ya kimataifa inayotukabili mwezi huu,” alisisitiza.
Kwa sasa, mashabiki na benchi la fundi la Simba wanasubiri kwa hamu kurejea kwa timu hiyo kutoka Afrika Kusini kabla ya kuingia kambini kikamilifu kwa ajili ya kuikabili Yanga na kuendelea na mechi za kimataifa.
