Antony Mligo Afichua Siri Nzito ya Ushindi Dhidi ya Yanga | Soka La Bongo

Baada ya kupitia kipindi kigumu cha matokeo yasiyoridhisha dhidi ya watani wao wa jadi, Yanga, hatimaye mashabiki wa Simba SC wamepata sababu ya kutabasamu. Hii ni baada ya timu yao kuibuka na ushindi mtamu wa mabao 2-1 katika Dabi ya Kariakoo iliyochezwa Uwanja wa Uhuru, Dar es Salaam.

Akizungumzia ushindi huo, beki mahiri wa Simba, Antony Mligo, amefichua kuwa silaha kubwa iliyowapa ushindi haikuwa nyingine bali ni dhamira ya dhati ya wachezaji kuwafuta machozi mashabiki wao na kurejesha furaha iliyokuwa imepotea.

Mligo alieleza kuwa wachezaji walitambua machungu ambayo mashabiki wao wamekuwa wakiyapitia mtaani kutokana na matokeo yaliyopita dhidi ya wapinzani wao wa jadi, jambo lililowapa kiu ya kupambana hadi mwisho.

“Kwanza, nafikiri niseme kwamba ushindi huu ni kwa ajili ya mashabiki wetu. Najua kwa wachezaji inaweza kuwa ngumu kidogo, lakini mashabiki wanapokuwa mitaani wanapitia kipindi kigumu, hasa ukizingatia tumepoteza michezo mingi. Nao ni mashabiki wa timu kubwa na wanatamani kujivunia timu yao,” alisema Mligo.

Beki huyo aliongeza kuwa hali hiyo iliwapa nguvu ya ziada wachezaji uwanjani kuhakikisha wanatoa kila kilicho bora, wakitambua kuwa ushindi mbele ya Yanga ndiyo ulikuwa ufunguo wa kurejesha heshima, amani na ari mpya kwa wanachama na mashabiki wa Msimbazi.

Ushindi huo wa mabao 2-1 sio tu kwamba umezima ukame wa matokeo mabaya dhidi ya Yanga, bali pia umeongeza mwamko mpya na matumaini makubwa kuelekea michezo ijayo ya ligi na michuano ya kimataifa.