Mohamed Shillaarejea AIK Sweden Baada ya Majukumu ya Taifa U-23

KIUNGO mshambuliaji wa klabu ya AIK ya nchini Sweden, Mohamed Shilla, amerudi rasmi nchini humo kuendelea na majukumu ya klabu baada ya kumaliza wajibu wake ndani ya kikosi cha timu ya taifa ya Tanzania ya U-23 (Ngorongoro Heroes).

Timu hiyo ilishindwa kufuzu Fainali za Mataifa ya Afrika kwa vijana (AFCON U-23) kufuatia bandika-bandua dhidi ya Kenya ambapo ilitolewa kwa jumla ya mabao 5-4. Shilla alikuwa miongoni mwa wachezaji tegemeo walioitwa kwenye kikosi hicho kilichokuwa chini ya Kocha Ahmad Ally kupambana kuwania tiketi hiyo.

Akizungumza na Mwanaspoti, Shilla amesema kuwa kurejea kwake Sweden kunalenga kusimamia ratiba za klabu yake kabla ya kutarajia kurejea Tanzania kwa ajili ya mapumziko mafupi.

“Kule kuna mambo nakwenda kuyaweka sawa, natarajia kukaa kama wiki tatu ndio nitarudi tena Bongo kwa ajili ya likizo. Tunapambana kama unavyofahamu unapocheza ligi kama ya Sweden lazima uishie kiprofeshional hivyo lazima uendane na ratiba utakayopewa,” alieleza Shilla.

Historia na Safari ya Mafanikio ya Shilla Kiungo huyo mahiri alitua AIK msimu uliopita akitokea kikosi cha vijana cha Azam FC, ambapo alionyesha kiwango cha juu sana. Katika msimu wa 2025/26, akiwa na Azam, alifunga mabao 8 na kutoa asisti 5 kwenye mechi 14 pekee huku akibeba tuzo ya mchezaji bora (MVP) na kuiwezesha timu hiyo kutwaa ubingwa wa U-20.

Vilevile, msimu wa 2024/25 alifunga mabao 12 na asisti 5 katika mechi 22, na msimu wa 2023/24 akiwa na kikosi cha U-17 alitupia mabao 15 na kunyakua tuzo ya MVP, kiwango kilichowashawishi mabosi wa AIK kumsajili rasmi.