Kauli ya Fadlu Davids Yanga SC Yaibua Mzuka Mpya Jangwani
Aliyewahi kuwa Kocha Mkuu wa Simba SC, Fadlu Davids, ametajwa kwenye rada za Yanga SC huku kauli zake za awali kuhusu changamoto za benchi la ufundi la Wananchi zikiibuka upya na kuzua mjadala mzito kwenye ulimwengu wa soka nchini.
Davids anahusishwa na mpango wa kurejea Tanzania kuchukua mikoba ya Manqoba Mngqithi, ambaye klabu hiyo ya Jangwani imeachana naye hivi karibuni. Endapo tetesi hizi zitathibitika, maneno ya kocha huyo aliyotoa awali kuhusu presha inayowakabili mabingwa hao watetezi yatakuwa na uzito mkubwa zaidi.
Presha ya Benchi Jipya la Ufundi Yanga
Akimulika hali ilivyo ndani ya kikosi cha Yanga SC, Fadlu Davids aliwahi kubainisha kuwa mabadiliko ya mara kwa mara ya makocha huongeza presha kubwa, licha ya timu hiyo kutwaa mataji yote msimu uliopita chini ya makocha watatu tofauti.
“Nadhani presha ipo kwa Yanga kwa sababu wana benchi jipya la ufundi. Yanga ilishinda mataji yote msimu uliopita ikiwa na makocha watatu tofauti, hivyo sasa presha ipo zaidi kwao,” alisema Davids.
Hata hivyo, kocha huyo aliongeza kuwa wachezaji waliobaki kikosini wana faida kubwa kutokana na uzoefu wao wa mechi kubwa, hasa Dabi ya Kariakoo dhidi ya Simba.
Mbinu ya Dabi na Mwendelezo wa Timu
Akizungumzia jinsi ya kukabiliana na mechi zenye presha kubwa kama dabi, Davids alisisitiza umuhimu wa kuwa na balance nzuri kati ya wachezaji wazoefu na wale wapya.
Akieleza mfano wa Simba wakati akiifundisha, alisema timu hiyo ilifanikiwa kujenga msingi imara kwa kuchanganya sura mpya 13 na wachezaji waliobaki kutoka msimu uliopita, huku kukiwa na mwendelezo mzuri wa benchi la ufundi.
“Tuna mwendelezo kwenye benchi la ufundi na kundi la msingi la wachezaji waliobaki. Unapojenga timu kuanzia kwenye msingi huo, unapata faida kubwa unapoingia kwenye mchezo wa presha,” alieleza.
Kutoka Raja Casablanca Mpaka Yanga SC?
Baada ya kuondoka Simba SC mwaka 2025 na kujiunga na Raja Casablanca ya Morocco, safari ya Davids nchini humo ilifikia kikomo mapema kutokana na matokeo yasiyoridhisha.
Kwa sasa, uongozi wa Yanga SC unaendelea na mchakato wa kusaka Kocha Mkuu mpya atakayeweza kufikia malengo ya klabu hiyo kiushindani. Je, Fadlu Davids ndiye atakayepewa mikoba ya kuongoza jahazi la Mabingwa wa Nchi? Mashabiki wanasubiri kwa hamu taarifa rasmi kutoka Jangwani.
