Nathaniel Chilambo
Simba SC

Pigo Simba SC! Hali ya Jeraha la Nathaniel Chilambo na Muda Atakaokaa Nje

Vardo November 19, 2026 8:30 am

Klabu ya Simba SC imetangaza kuwa inasubiri ripoti kamili ya kitabibu kutoka kwa madaktari wa timu ya Taifa ‘Taifa Stars’ ili kujua hatua za haraka za kuchukua kufuatia jeraha alilolipata beki wake, Nathaniel Chilambo, akiwa kwenye majukumu ya timu ya taifa.

Beki huyo kisiki alipata jeraha la mishipa wakati akiitumikia Taifa Stars kwenye mchezo mkali wa kuwania kufuzu Fainali za Mataifa ya Afrika (AFCON) dhidi ya Nigeria, mchezo uliopigwa visiwani Zanzibar. Kutokana na ukubwa wa jeraha hilo, ripoti za awali zinaeleza kuwa Chilambo huenda akakaa nje ya uwanja kwa muda wa wiki tatu hadi nne.

Taarifa Rasmi Kutoka Simba SC

Akizungumzia maendeleo ya nyota huyo, Meneja wa Idara ya Habari na Mawasiliano wa Simba SC, Ahmed Ally, amebainisha kuwa mchezaji huyo anatarajiwa kuwasili kambini kesho akitokea visiwani Zanzibar akiwa na nyaraka zote za vipimo alivyofanyiwa hospitalini.

“Chilambo leo wamerejea kutoka Zanzibar na kesho atawasili kambini. Tutampokea pamoja na taarifa za madaktari wa timu ya Taifa Stars. Baada ya hapo tutaangalia nini kimeshauriwa kwa sababu baada ya kuumia alipelekwa hospitalini na kufanyiwa vipimo,” alisema Ahmed Ally.

Hatua Zinazofuata za Matibabu

Ahmed ameongeza kuwa uongozi na benchi la ufundi la Wekundu wa Msimbazi hawataki kukurupuka kutoa tamko la mwisho kabla ya kujiridhisha na ushauri wa wataalamu wa afya waliomhudumia mchezaji huyo awali.

“Kwa hiyo atakuja kambini, tutapata taarifa za vipimo kutoka kwa madaktari wa Taifa Stars na hapo tutakuwa katika nafasi nzuri ya kueleza nini kinaendelea,” alisisitiza.

Kukosekana kwa Nathaniel Chilambo kwa takribani mwezi mmoja kunatarajiwa kuwa pigo kwa kikosi cha Simba SC katika mechi zijazo za kimashindano, huku mashabiki wakisubiri kwa hamu taarifa rasmi ya jopo la madaktari wa klabu hiyo mara baada ya kuwasili kambini.

Yanga vs Polisi Tanzania: Kauli ya Ali Kamwe Kabla ya Safari ya Moshi!