Pigo Yanga: Ibrahim Bacca Kuukosa Mchezo Dhidi ya Polisi Tanzania
Klabu ya Yanga SC imepata pigo kuelekea mchezo wao ujao wa Ligi Kuu ya NBC dhidi ya Polisi Tanzania, baada ya kuthibitika kuwa beki wake tegemeo, Ibrahim Bacca, ataukosa mchezo huo kutokana na majeraha aliyoyapata akiwa kwenye majukumu ya timu ya Taifa (Taifa Stars).
Akizungumza kuhusu maandalizi ya kikosi hicho, Afisa Habari na Mawasiliano wa Yanga, Ali Kamwe, amebainisha kuwa Bacca hatakuwa sehemu ya msafara utakaosafiri kwenda mkoani Kilimanjaro (Moshi) kwa ajili ya mchezo huo, huku akifafanua kuwa beki huyo atafanyiwa vipimo zaidi vya kitabibu ili kubaini ukubwa wa jeraha lake.
Habari Njema: Kangwanda, Dube na Yao Warejea
Licha ya pengo la Ibrahim Bacca, Kamwe amewatoa hofu mashabiki wa Jangwani kwa kutangaza kurejea kwa nyota wengine watatu waliokuwa nje ya uwanja:
-
Albert Kangwanda: Ameimarika kiafya na anatarajiwa kuanza mazoezi ya pamoja na wenzake kesho endapo taratibu zote zitakwenda sawa.
-
Dube Buya na Yao Yao: Wawili hawa tayari wameanza mazoezi ya pamoja na kikosi hicho, huku beki Yao Yao akionyesha kuwa fiti kwa kufunga bao katika mchezo wa mazoezi.
Wito kwa Mashabiki wa Moshi
Akizungumzia mchezo huo dhidi ya Polisi Tanzania, Ali Kamwe ametoa wito maalumu kwa mashabiki wa Yanga waliopo Moshi na mikoa ya jirani kujitokeza kwa wingi uwanjani ili kuwapa hamasa wachezaji.
“Mimi nyumbani ni Moshi, kwa hiyo Wana Yanga waliopo huko tujiandae na tujitokeze kwa wingi. Tukawe pamoja, tufurahie na kuisapoti Yanga yetu ili tuweze kupata matokeo mazuri,” amesema Kamwe.