WAKATI mashabiki wa Simba wakisalia na maswali kuhusu mwenendo wa timu ya wanaume, timu ya wanawake ya Simba Queens imeendelea kuwa chanzo cha tabasamu kwa Wanasimba kwa kuonyesha kiwango bora na ushindi wa kuvutia kwenye Ligi ya Wanawake Tanzania.
Simba Queens waliendeleza mwendo huo mzuri baada ya kuibuka na ushindi mnono wa mabao 3-0 dhidi ya Tausi FC katika mchezo uliopigwa kwenye Uwanja wa KMC Complex, Mwenge jijini Dar es Salaam, ambapo Simba walikuwa wenyeji wa mchezo huo.
Nyota wa mchezo huo alikuwa Aisha Mnuka aliyefunga mabao mawili, akionyesha ubora wake mbele ya lango, huku bao la tatu likifungwa na Jentrix Shikangwa na kuhitimisha karamu ya mabao kwa Simba Queens.
Katika kipindi cha kwanza, Simba Queens walionyesha udhibiti mkubwa wa mchezo na kufanikiwa kutamatisha dakika 45 za mwanzo wakiwa mbele kwa mabao 3-0, hali iliyowapa utulivu na kuonyesha tofauti ya ubora kati yao na wapinzani wao Tausi FC.
Katika michezo mingine ya ligi hiyo, Yanga Princess walipata ushindi wakiwa ugenini baada ya kuifunga Fountain Gate Princess kwa mabao 5-4, ushindi uliothibitisha pia ushindani mkubwa unaoendelea kushamiri kwenye ligi hiyo.
Kwa upande mwingine, mabingwa watetezi JKT Queens waliendeleza ubabe wao baada ya kuibuka na ushindi mwembamba wa bao 2-0 dhidi ya wenyeji wao Ruangwa Queens, matokeo yaliyozidi kuipa ligi hiyo mvuto na ushindani mkubwa.
