KLABU ya CR Belouizdad ya Algeria imekamilisha usajili wa kiungo mahiri wa Simba SC, Jean Charles Ahoua, hatua inayomaliza rasmi safari ya nyota huyo ndani ya kikosi cha mabingwa wa Tanzania.
Ahoua anatarajiwa kuondoka nchini wiki ijayo ili kujiunga na timu hiyo chini ya kocha Sead Ramović.
Ahoua, raia wa Ivory Coast, amejizolea sifa kubwa kutokana na uwezo wake wa kuchezesha timu, akili ya uwanjani na ubora wa kiufundi akiwa na mpira.
Ndani ya Simba, alikuwa miongoni mwa wachezaji muhimu waliotoa mchango mkubwa katika safu ya kiungo, hasa katika kudhibiti mchezo na kuanzisha mashambulizi.
Kwa mujibu wa taarifa kutoka karibu na dili hilo, CR Belouizdad wameonyesha imani kubwa na uwezo wa Ahoua, wakiamini atakuwa mhimili muhimu katika mipango yao ya mashindano ya ndani na ya kimataifa.
Usajili wake unaonekana kuwa sehemu ya mkakati wa kuimarisha safu ya kati kwa ubunifu na utulivu zaidi.
Kwa upande wa Simba SC, kuondoka kwa Ahoua ni pigo, lakini pia kunatoa nafasi kwa benchi la ufundi kufanya maboresho na kuleta wachezaji wapya watakaokidhi falsafa ya kocha kuelekea msimu ujao Uongozi wa klabu unatarajiwa kuingia sokoni kutafuta mbadala wake mapema.
Kwa ujumla, uhamisho wa Ahoua kwenda CR Belouizdad ni hatua kubwa katika maisha yake ya soka, huku mashabiki wakisubiri kuona atakavyojitangaza katika soka la Algeria na mashindano ya Afrika.
Usajili huu unaendelea kuthibitisha kuwa wachezaji kutoka Ligi Kuu Tanzania Bara wanaendelea kupata nafasi katika klabu kubwa barani Afrika.
