KOCHA Mkuu wa Young Africans Sports Club, Pedro Goncalves, ameweka wazi mkakati mpya wa kikosi chake kuelekea michezo ijayo ya mashindano ya ndani na kimataifa, akisisitiza umuhimu wa timu hiyo kuendelea kufanya vizuri ili kutimiza malengo waliyojiwekea msimu huu.
Kocha huyo amesema benchi la ufundi la Yanga limekuwa likifanya tathmini ya kina ya kikosi chake ili kubaini maeneo yanayohitaji maboresho.
Ameeleza kuwa lengo kuu la tathmini hiyo ni kuhakikisha timu inaendelea kuwa imara, yenye ushindani mkubwa na inayoweza kupata matokeo chanya katika kila mchezo unaofuata.
Pedro ameongeza kuwa licha ya changamoto mbalimbali zinazojitokeza katika msimu mrefu wa mashindano, bado kikosi chake kina morali kubwa na wachezaji wana ari ya kupambana kwa ajili ya kuipa timu mafanikio kila wanapopata nafasi ya kucheza.
“Maandalizi yetu kwa sasa yanajikita katika kuboresha mbinu za ushambuliaji pamoja na kuongeza uimara wa safu ya ulinzi. Ushirikiano mzuri wa wachezaji ndani ya uwanja ndiyo silaha kubwa itakayosaidia kufanikisha malengo ya timu,” amesema Pedro.
Katika hatua nyingine, kocha huyo amewataka wachezaji wake kuendelea kuwa na nidhamu pamoja na kujituma zaidi mazoezini ili kuhakikisha wanakuwa tayari wakati wowote wanapohitajika uwanjani.
Amesema kutokana na ugumu wa ratiba ya mashindano pamoja na changamoto za majeruhi, ni muhimu kwa kikosi chake kujiandaa vizuri kwa kila mpinzani wanayekutana naye ili kuongeza nafasi ya kuvuna alama tatu katika kila mchezo.
Pedro pia amebainisha kuwa baada ya Yanga kufanikiwa kupata ushindi dhidi ya Tanzania Prisons, sasa nguvu zote zimeelekezwa katika maandalizi ya mchezo ujao dhidi ya Azam FC, ambao anaamini ni muhimu kwa timu yake kuibuka na ushindi.
Yanga inatarajiwa kushuka dimbani Jumapili hii katika Uwanja wa Benjamin Mkapa Stadium kuvaana na Azam FC katika mchezo unaosubiriwa kwa hamu na mashabiki wengi wa soka jijini Dar es Salaam.
