KOCHA Fred Felix ‘Minziro’ anakabiliwa na mtihani mzito katika kibarua chake kipya cha kuinoa Fountain Gate, akitarajiwa kuanza rasmi majukumu yake kwa presha kubwa dhidi ya Simba katika mchezo wa Ligi Kuu Tanzania Bara utakaochezwa leo saa 10:00 jioni kwenye Uwanja wa Sheikh Amri Abeid, Arusha.
Minziro, aliyeteuliwa kushika mikoba ya Mohamed Ismail ‘Laizer’, anatarajiwa kushuka dimbani akiwa na dhamira ya kuonyesha uwezo wake mapema, akisaidiwa na benchi lake la ufundi linalojumuisha Mathias Wandiba.
Uteuzi wake uliofanyika Aprili 10, 2026 umeibua matumaini mapya kwa mashabiki wa Fountain Gate wanaotarajia kuona mabadiliko chanya ndani ya kikosi hicho.
Pamoja na uzoefu wake mkubwa katika soka la ndani, Minziro anaingia kwenye mechi hiyo akiwa na kumbukumbu nzuri ya ushindi wa mabao 4-0 dhidi ya Azam FC katika Kombe la Shirikisho la CRDB, matokeo yaliyoongeza morali kwa wachezaji wake kuelekea pambano hilo gumu.
Hata hivyo, anakutana na Simba iliyo katika kiwango kizuri, baada ya ushindi wa mabao 3-1 dhidi ya Dodoma Jiji uliowahakikishia tiketi ya robo fainali ya michuano hiyo. Hali hiyo inaifanya mechi ya leo kuwa ya ushindani mkubwa kwa pande zote mbili.
Mchezo huo unatarajiwa kuwa na mvuto mkubwa katika Uwanja wa Sheikh Amri Abeid, ambapo kila timu itahitaji alama tatu muhimu ili kuboresha nafasi zao kwenye msimamo wa ligi.
Simba wanashika nafasi ya pili wakiwa na pointi 36 wakimkimbiza kinara Yanga, huku Fountain Gate wakisaka kujinasua kutoka maeneo ya chini ya jedwali.
Kwa upande wake, Minziro atalazimika kutumia uzoefu wake alioupata katika vilabu mbalimbali ikiwemo KMC, Geita Gold na Singida Big Stars, ili kuhakikisha timu yake inakuwa imara zaidi, hasa katika safu ya ulinzi na ushambuliaji.
Msemaji wa Fountain Gate, Issa Mbuzi, ameweka wazi kuwa wanautambua ugumu wa mchezo huo, lakini wanaamini benchi lao la ufundi lina uwezo wa kuibadilisha timu hiyo na kuanza kupata matokeo chanya, wakianza na mtihani huo mkubwa dhidi ya Simba.
