WAMETUPIA SANA MSIMU MMOJA LIGI YA MABINGWA

Miaka miwili baadaye, Ronaldo alikaribia kuvunja rekodi yake mwenyewe alipofunga mabao 16 katika msimu wa 2015-16, akiwa njiani kuisaidia tena Real Madrid kutwaa ubingwa. Alifunga mabao 11 katika hatua ya makundi, rekodi ya mchezaji mmoja katika msimu wa Ligi ya Mabingwa. Idadi hiyo ilikuwa mabao mawili zaidi ya mfungaji wa pili bora msimu huo, Robert Lewandowski (mabao tisa). Alianza msimu kwa hat-trick dhidi ya Shakhtar Donetsk, na akamaliza hatua ya makundi kwa kufunga mabao manne dhidi ya Malmo FF. Hakufunga kwenye fainali dhidi ya Atlético Madrid, lakini alifunga penalti ya ushindi katika mikwaju ya penalti, Real Madrid ikitwaa taji mjini Milan.

Ronaldo, Lewandowski, Benzema, Mbappe (15)

Msimu wa tatu bora wa Cristiano Ronaldo ulikuwa 2017-18 alipofunga mabao 15, huku Real Madrid ikishinda taji kwa kuifunga Liverpool 3-1 katika fainali. Nyota huyo hakufunga kwenye fainali, lakini alifunga katika mechi 10 msimu huo akilingana na rekodi yake ya kufunga katika mechi nyingi zaidi za Ligi ya Mabingwa kwa msimu mmoja. Vilevile katika mastaa wenye rekodi ya kufunga mabao 15, Robert Lewandowski aliingia fainali ya 2019-20 akihitaji bao moja kufikia rekodi ya kufunga katika mechi 10 tofauti, lakini hakufanikiwa.

Hata hivyo, Bayern Munich ilishinda bao 1-0 dhidi ya PSG, na Lewandowski alikuwa amefunga mabao 15 katika mechi tisa kabla ya fainali. Katika msimu wa 2021-22, mabao 10 kati ya 15 ya Karim Benzema yalitoka hatua ya mtoano, rekodi iliyokuwa mikonon mwa Ronaldo (2016-17). Alifunga hat-trick dhidi ya PSG, nyingine dhidi ya Chelsea, pamoja na mabao muhimu dhidi ya Manchester City. Hakufunga fainali dhidi ya Liverpool, lakini Real Madrid ilitwaa ubingwa.