BAADA ya kukaa nje kwa muda wakisumbuliwa na majeraha, wachezaji wa Yanga SC, Mohamed Hussein (Zimbwe JR) na Farid Mussa, wamerejea rasmi mazoezini tayari kwa maandalizi ya michezo ijayo ya Ligi Kuu Tanzania Bara.
Kurejea kwa nyota hao kumekuja katika kipindi muhimu kwa Yanga ambayo inaendelea kupambana kuhakikisha inamaliza msimu kwa nguvu huku ikisaka kuendelea kubaki kileleni mwa msimamo wa ligi.
Wachezaji hao walionekana wakishiriki mazoezi pamoja na wenzao katika programu maalum ya kujiandaa na mchezo dhidi ya Coastal Union utakaochezwa kesho Mei 9, 2026 katika dimba la KMC Complex, Mwenge.
Ujio wao umeongeza morali ndani ya kikosi hicho huku benchi la ufundi likipata ahueni baada ya kukumbwa na changamoto ya kukosekana kwa baadhi ya nyota muhimu kwenye michezo iliyopita.
Zimbwe JR ambaye ni nahodha msaidizi wa timu hiyo, amekuwa mhimili muhimu katika safu ya ulinzi kutokana na uwezo wake wa kucheza kwa nidhamu pamoja na kusaidia mashambulizi kupitia pembeni.
Kurejea kwake kunatajwa kuwa silaha muhimu kwa Yanga katika kipindi hiki cha mwisho wa msimu ambapo ushindani wa ligi umeendelea kuwa mkubwa.
Kwa upande wa Farid Mussa, kurejea kwake kunatarajiwa kuongeza ubunifu katika safu ya ushambuliaji kutokana na uwezo wake wa kutengeneza nafasi, kucheza kwa kasi na kusaidia kuibadilisha sura ya mchezo.
Taarifa kutoka ndani ya kikosi hicho zinaeleza kuwa benchi la ufundi linaendelea kufuatilia maendeleo ya wachezaji hao kabla ya kufanya maamuzi ya mwisho kuhusu uwepo wao kwenye mchezo dhidi ya Coastal Union.
Hata hivyo, maendeleo yao mazoezini tayari yameanza kuwapa matumaini makubwa mashabiki wa Yanga wanaotamani kuwaona nyota hao wakirejea uwanjani kwa kiwango bora.
Yanga itaingia kwenye mchezo huo ikiwa na dhamira ya kuendelea kujikita kileleni mwa msimamo wa ligi, huku kurejea kwa Mohamed Hussein na Farid Mussa kukiongeza ushindani wa nafasi ndani ya kikosi hicho.
