KUNA WANAONDOKA, KUNA WANAOKUJA YANGA YAANZA KUSUKA KIKOSI KIPYA

RAIS wa Yanga SC, Injinia Hersi Said, ameanza kuonyesha dhamira ya kufanya maboresho makubwa ndani ya kikosi hicho kuelekea msimu wa 2026/27, huku taarifa zikieleza kuwa baadhi ya usajili wa wachezaji wapya tayari umekamilika kwa siri kubwa.

Taarifa zinazoendelea kusambaa mitandaoni zinaeleza kuwa uongozi wa Yanga upo kwenye mkakati wa kujenga kikosi imara zaidi kitakachokuwa na ushindani mkubwa ndani ya nchi na kwenye michuano ya kimataifa, baada ya kubaini changamoto zilizojitokeza katika baadhi ya mechi za msimu huu.

Inaelezwa kuwa maboresho hayo hayatagusa eneo moja pekee, bali yatahusisha karibu kila idara muhimu ndani ya timu. Yanga inatajwa kuangalia uwezekano wa kuongeza nguvu kwenye safu ya ulinzi, kiungo, ushambuliaji pamoja na nafasi ya golikipa ikiwa kutakuwa na ulazima wa kufanya hivyo.

Chanzo cha karibu na klabu hiyo kimeeleza kuwa Hersi amekuwa makini sana katika dirisha hili la usajili, akifuatilia kwa karibu mapendekezo kutoka kwa benchi la ufundi ili kuhakikisha timu inasajili wachezaji wenye ubora, uwezo mkubwa na wanaoendana na falsafa ya klabu hiyo.

Baadhi ya nyota waliopo ndani ya kikosi cha sasa wanaweza kuachwa mwishoni mwa msimu kutokana na tathmini ya kiufundi inayoendelea kufanywa. Hatua hiyo inalenga kutoa nafasi kwa damu mpya itakayoongeza ushindani na kuimarisha kiwango cha timu kwa ujumla.

Yanga inaonekana kujipanga mapema kwa ajili ya msimu ujao, huku viongozi wake wakiamini kuwa kufanya usajili wa mapema kutaisaidia timu kupata muda wa kutosha kuunda kikosi bora kabla ya kuanza kwa mashindano mapya ya ligi na kimataifa