USAJILI WA GIRUMUGISHA YANGA, KAMWE AWEKA MAMBO WAZI
UONGOZI wa Yanga umevunja ukimya na kutoa ufafanuzi kuhusu taarifa zinazowahusisha na usajili wa mshambuliaji wa Al Hilal Omdurman, Jean Claude Girumugisha, ambaye amekuwa akitajwa kuingia kwenye rada za mabingwa hao wa Tanzania Bara kuelekea msimu ujao.
Katika siku za hivi karibuni, kumekuwa na taarifa zikidai kuwa Yanga ipo kwenye mazungumzo ya kumshawishi mshambuliaji huyo kujiunga na kikosi hicho kwa lengo la kuongeza nguvu kwenye safu ya ushambuliaji kabla ya kuanza kwa msimu mpya.
Tetesi hizo zimezua mjadala mkubwa miongoni mwa mashabiki wa soka, hasa kutokana na uwezo wa Girumugisha ambaye ameonyesha kiwango kizuri akiwa na Al Hilal Omdurman na kuvutia klabu mbalimbali barani Afrika.
Hata hivyo, Msemaji wa Yanga, Ali Kamwe, ameweka wazi kuwa hadi sasa klabu hiyo haijafanya mazungumzo yoyote na mchezaji huyo kama inavyodaiwa na baadhi ya taarifa zinazosambaa.
Kamwe amesema jina la Girumugisha linabaki kuwa sehemu ya tetesi za usajili ambazo zimekuwa zikihusishwa na Yanga katika kipindi hiki cha maandalizi ya msimu mpya.
Amesisitiza kuwa uongozi wa klabu hiyo unaendelea na mchakato wa kuimarisha kikosi, lakini usajili unaofanyika unazingatia mahitaji halisi ya benchi la ufundi ili kuhakikisha timu inakuwa na ushindani mkubwa katika michuano yote itakayoshiriki.
“Hizo ni tetesi tu, hatujafanya mazungumzo na huyo mchezaji. Lakini tunafanya usajili mzuri kulingana na mahitaji ya timu yetu kwa msimu ujao,” amesema Kamwe, akibainisha kuwa mashabiki wanapaswa kuwa na subira wakati klabu ikiendelea kukamilisha mipango yake ya usajili.
