MECHI TATU ZA MAAMUZI ZAJA, BARKER ATAMBA SIMBA IPO TAYARI
KOCHA Mkuu wa Simba SC, Steven Barker, amesema kikosi chake kinaingia katika kipindi kigumu na cha maamuzi katika mbio za kuwania ubingwa wa Ligi Kuu Tanzania Bara, lakini hana wasiwasi wowote kuhusu uwezo wa timu yake kumaliza kazi iliyobaki.
Kauli hiyo imekuja baada ya Simba kuibuka na ushindi mwembamba wa bao 1-0 dhidi ya Mbeya City katika mchezo uliochezwa Uwanja wa Sokoine jijini Mbeya, matokeo yaliyoifanya timu hiyo kuendelea kujiweka kwenye nafasi ya kupigania taji hadi mwisho wa msimu.
Barker amesema walikutana na upinzani mkali kutoka kwa Mbeya City, hali iliyowalazimu kupambana kwa nguvu kubwa ili kuhakikisha wanapata pointi tatu muhimu katika mazingira magumu ya ugenini.
Ameeleza kuwa ushindi huo umeongeza hali ya kujiamini ndani ya kikosi chake, huku wachezaji wakitambua kuwa kila mchezo uliobaki una uzito mkubwa katika kuamua hatima ya mbio za ubingwa.
“Nimeona mchezo mgumu dhidi ya Mbeya City, lakini sina hofu na mechi tatu zilizobaki. Tunajua nini tunatakiwa kufanya katika mbio za ubingwa,” amesema Barker baada ya mchezo huo.
Kocha huyo amesisitiza kuwa Simba inapaswa kubaki na umakini mkubwa kwani mechi za mwisho wa msimu huwa ngumu zaidi kutokana na kila timu kupigania malengo yake, jambo linalofanya ushindani kuwa mkali kuliko ilivyokuwa awali.
Kwa mujibu wa ratiba, Simba itakutana na Mtibwa Sugar Juni 24 mjini Morogoro kabla ya kuikaribisha Singida Black Stars Juni 27, kisha kuhitimisha msimu dhidi ya KMC FC Juni 30. Katika kipindi hiki kigumu na cha maamuzi, Wekundu wa Msimbazi wanaamini wana kila sababu ya kuendelea kupambana hadi dakika ya mwisho wakisaka ubingwa wa ligi.
