Sababu za Seleman Mwalimu Kukosekana Kikosi cha Simba SC Leo
Mshambuliaji wa Simba SC, Seleman Mwalimu, amekosekana kwenye kikosi kinachoshuka dimbani leo dhidi ya MCC katika mchezo wa Kombe la CECAFA Kagame, kutokana na changamoto za kikanuni zinazohusiana na upatikanaji wa ruhusa yake ya kuitumikia klabu hiyo.
Taarifa za ndani zinaeleza kuwa uongozi wa Simba SC unaendelea na mazungumzo na klabu ya Wydad Athletic Club ya Morocco ili kupata suluhu ya haraka, kwani suala hilo ndilo lililomzuia nyota huyo kuwa sehemu ya kikosi kwenye mchezo wa leo.
Pigo Kwa Kocha Steve Barker
Kutokuwepo kwa Mwalimu ni pigo kwa benchi la ufundi linaloongozwa na Kocha Mkuu, Steve Barker, ikizingatiwa kuwa mchezaji huyo anatarajiwa kuwa mhimili mkubwa katika safu ya ushambuliaji ya Simba kuelekea msimu wa 2026/27.
Inaelezwa kuwa Barker alikuwa amemjumuisha Mwalimu kwenye mipango yake ya kwanza ya michuano hii ya CECAFA Kagame, lakini mkwamo uliopo kati ya Simba na Wydad umechelewesha kuonekana kwake uwanjani.
Chanzo cha Mkwamo Baina ya Simba na Wydad
Hivi karibuni, Simba ilitangaza kuendelea kubaki na Mwalimu kwa mkataba wa mkopo baada ya kufikia makubaliano na uongozi uliopita wa Wydad Athletic Club. Hata hivyo, ingizo la uongozi mpya ndani ya Wydad limeleta mabadiliko, ambapo wameeleza kutoyatambua makubaliano ya awali na kutaka mazungumzo yaanze upya.
Meneja wa Habari na Mawasiliano wa Simba SC, Ahmed Ally, amethibitisha kuwa viongozi wa klabu hiyo wako kwenye mazungumzo ya kina na uongozi huo mpya wa Wydad ili kukamilisha taratibu zote na kuhakikisha Seleman Mwalimu anapata kibali cha kuitumikia Simba SC bila kikwazo msimu huu wa 2026/27.
