Kocha Steve Barker Afunguka Kuhusu Mshambuliaji Mothusi Cooper Simba SC

KOCHA Mkuu wa Simba SC, Steve Barker, amesema bado hajafanya uamuzi wa mwisho kuhusu mshambuliaji Mothusi Cooper anayefanya majaribio ndani ya kikosi hicho, akisisitiza kuwa anahitaji muda zaidi wa kumtathmini kabla ya kutoa kauli rasmi.

Kwa sasa, Wekundu wa Msimbazi wapo nchini Rwanda wakishiriki michuano ya CECAFA Kagame Cup. Katika mchezo wa kwanza dhidi ya Mogadishu City Club uliomalizika kwa sare ya 0-0, Cooper alipata fursa ya kushuka dimbani na kuonyesha uwezo wake.

Simba inatarajiwa kushuka tena uwanjani kuvaana na Jamus FC katika mchezo wa pili wa kundi hilo. Kocha Barker anapanga kutumia mechi hii kuendelea kuijenga timu na kuwapa nafasi wachezaji wapya, ikiwa ni pamoja na kumtazama zaidi Cooper.

⚽ Mfumo na Falsafa Mpya

Barker amebainisha kuwa lengo lake kuu kwa sasa ni kuhakikisha wachezaji wote wapya wanaingia kwenye mfumo na kuelewa misingi ya soka analotaka timu icheze.

“Jambo kubwa kwangu ni kuona wachezaji wetu wapya wakiungana na wenzao, waielewe timu na kucheza katika falsafa yetu. Wameanza vizuri kina Nathan Chilambo na Bakari Msimu, lakini kuhusu Mothusi Cooper bado yupo kwenye uangalizi,” amesema Barker.

Akiendelea kufafanua, kocha huyo aliongeza:

“Alionyesha kiwango kizuri, lakini huwezi kufanya maamuzi ya mwisho kwa kutazama mchezo mmoja tu. Tunataka kumpa nafasi nyingine katika mchezo unaofuata ili tuendelee kumuangalia.”

🏆 Malengo ya Simba SC

Barker alisisitiza kuwa maamuzi ya kikosi cha kwanza yatategemea mahitaji ya timu na maandalizi ya michuano mikubwa iliyo mbele yao, ikiwemo Ngao ya Jamii na Ligi Kuu Ya NBC.

Pamoja na kuwafanyia tathmini wachezaji, Simba inaingia kwenye mchezo wa leo dhidi ya Jamus FC ikiwa na kiu ya kupata ushindi wake wa kwanza ili kujiweka kwenye nafasi nzuri ya kutinga hatua inayofuata ya CECAFA Kagame Cup.