Yanga Yaweka Mtego Mzito kwa Simba: Mikakati Mipya Yawekwa Wazi Kabla ya Safari ya Zanzibar!
Mabingwa watetezi wa Ligi Kuu Tanzania Bara, Yanga SC, wameanza rasmi kuweka mikakati kabambe kuelekea pambano lao la Ngao ya Jamii dhidi ya watani wao wa jadi, Simba SC, huku wakisisitiza umuhimu wa kukamilisha mapema ratiba ya Siku ya Wananchi ili kuwapa wachezaji muda wa kutosha wa kupumzika.
Kikosi hicho cha Wananchi kinatarajiwa kushuka dimbani Jumapili ya Agosti 9 kwenye Uwanja wa Uhuru, Dar es Salaam, katika kilele cha Siku ya Wananchi ambapo watacheza mchezo wa kirafiki dhidi ya Aigles du Congo kutoka Jamhuri ya Kidemokrasia ya Congo (DRC). Mchezo huo utakaopigwa kuanzia saa 1:00 usiku utakuwa kipimo cha mwisho kwa kocha na benchi la fundi kabla ya kuingia kambini Zanzibar.
Msemaji wa Yanga SC, Ali Kamwe, ameeleza kuwa klabu hiyo inatambua uzito wa ratiba iliyonayo mbele yake na inalenga kuhakikisha wachezaji wanapata muda mzuri wa kurejesha miili yao kabla ya kuikabili Simba.
“Tunafahamu kutoka Agosti 9 hadi Agosti 12, ambayo itakuwa siku ya Jumatano, Yanga itakuwa na mchezo mkubwa wa Ngao ya Jamii dhidi ya Simba. Kwa hiyo tunatamani mechi hii ya Siku ya Wananchi ichezwe na imalizike mapema kabisa,” alisema Kamwe.
“Wachezaji wakipata muda wa kupumzika, halafu Jumatatu, Mungu akijalia kheri, tutaanza safari ya kuelekea Zanzibar kuanza kambi rasmi ya maandalizi ya Ngao ya Jamii,” aliongeza Kamwe.
Mbali na kutoa burudani kwa maelfu ya mashabiki watakaojitokeza Uwanja wa Uhuru, mchezo huo wa kirafiki dhidi ya Aigles du Congo unachukuliwa kama fursa muhimu ya kukiweka kikosi kwenye hali ya ushindani wa hali ya juu.
Yanga inaingia kwenye maandalizi haya ikitaka kutetea heshima yake na kuanza msimu mpya wa soka nchini kwa kutwaa taji la Ngao ya Jamii, huku mechi hiyo ya Kariakoo Derby ikitarajiwa kuwa na ushindani wa katakata.
