Simba Queens Yaelekea Kenya Kujiandaa na CECAFA 2026
Mabingwa watetezi wa Ligi Kuu ya Wanawake Tanzania Bara, Simba Queens, kesho Agosti 11 wanatarajiwa kusafiri kuelekea nchini Kenya kuweka kambi maalum ya maandalizi kuelekea mashindano ya Kombe la Afrika Mashariki (CECAFA) yatakayotoa mwakilishi wa Ligi ya Mabingwa Afrika.
Kikosi hicho kinatarajiwa kukaa nchini Kenya kwa takribani siku saba ambapo mbali na mazoezi makali, kitacheza michezo kadhaa ya kirafiki ili kuongeza utulivu na mbinu kabla ya kuanza rasmi kwa kipakipaki cha kusaka taji hilo.
Michuano ya CECAFA mwaka huu inatarajiwa kutimua vumbi nchini Rwanda kuanzia Agosti 21 hadi Agosti 29. Ikumbukwe kuwa mabingwa watetezi wa michuano hii ni JKT Queens ya Tanzania.
Upinzani Mkali Kundi C Simba Queens imepangwa katika Kundi C ikijumuisha timu ngumu za Kenya Police Bullets (Kenya) pamoja na Top Girls (Burundi). Kundi hili linahitaji maandalizi ya hali ya juu ili kuhakikisha Wekundu wa Msimbazi hao wanafanikiwa kubeba taji lao la pili la kanda hiyo.
Hellen Kutsanedzi Azungumza Akizungumzia safari hiyo na maandalizi kwa ujumla, beki mpya wa kushoto wa Simba Queens aliyesajiliwa hivi karibuni kutoka Epiphany Warriors, Hellen Kutsanedzi, amebainisha kuwa kambi hiyo itakuwa chachu kubwa ya mafanikio kwao.
“Nafikiri ni hatua nzuri sana kwa sababu michuano mikubwa kama hii inahitaji maandalizi ya kutosha ili kujiweka sawa. Tunaamini tutakuwa na mashindano mazuri,” alisema Kutsanedzi.
Beki huyo ameongeza kuwa ni fahari kubwa kwake kushiriki michuano ya CECAFA kwa mara ya kwanza kwani ni jukwaa zuri la kuonekana kimataifa kwani mechi hizo huvutia mawakala na viongozi wengi wa klabu kubwa.
“Zinakutana timu nyingi lakini pia kuna mawakala na viongozi wa timu tofauti. Unapofanya vizuri ni fursa kubwa, hivyo naahidi kutoa mchango wangu wote ili timu yetu ifanye vizuri,” alihitimisha.
