Kesi ya Manchester City: Adhabu na Hatari ya Kupokwa Mataji
LONDON, ENGLAND – Gwiji wa zamani wa Liverpool, Graeme Souness, ametoa onyo zito akidai kuwa historia ya mafanikio makubwa ya Manchester City inaweza kuingia kwenye doa nene endapo klabu hiyo itapatikana na hatia katika kesi inayokabili ya ukiukaji wa kanuni za kifedha za Ligi Kuu England (EPL).
Souness amekwenda mbali zaidi kwa kueleza kuwa mataji yote ambayo Man City imeyatwaa katika kipindi kinachohusishwa na tuhuma hizo yanaweza kuhojiwa, huku akipendekeza kuwa majirani zao au washindani wao wa karibu kama Liverpool wanaweza kupewa baadhi ya mataji hayo.
“Wataingia Kwenye Historia Kama Wadanganyifu”
Akizungumza na kituo cha Track Radio, Souness alisema urithi na mafanikio ya uwanjani ya Man City yapo hatarini kutoweka machoni pa mashabiki wa soka duniani.
“Urithi wao utakuwa umeondoka kabisa. Mambo yakienda vibaya kwao, wataingia kwenye vitabu vya historia kama klabu iliyofanikiwa kwa udanganyifu,” alisema Souness.
Kesi hiyo kubwa, iliyoanza rasmi mwaka 2023, ilihitimisha usikilizaji wa ushahidi Desemba 2024. Vyanzo mbalimbali vinaarifu kuwa klabu hiyo inakabiliwa na tuhuma nzito za makosa 114 kati ya mashtaka 115 yaliyowasilishwa.
Adhabu Zinazoweza Kuipata Manchester City
Endapo jopo la majaji litaitia hatiani klabu hiyo, adhabu zinazotajwa zinaweza kuwa za kihistoria katika soka la Uingereza, zikijumuisha:
-
Faini kubwa za kifedha.
-
Kupunguziwa pointi nyingi kwenye msimu husika.
-
Kushushwa daraja hadi ligi za chini (Championship au League One).
-
Kuvuliwa na kupokwa baadhi ya mataji ya Ligi Kuu.
Tuhuma za Miaka 14 na Mkataba wa Siri wa Mancini
Uchunguzi dhidi ya Manchester City ulianza mwaka 2018 kufuatia ufichuzi uliofanywa na jarida la Der Spiegel la Ujerumani kupitia nyaraka za Football Leaks.
Tuhuma hizo zinahusisha kipindi cha miaka 14 (kuanzia 2009/10 hadi 2017/18), zikiwemo:
-
Taarifa za Uongo za Kifedha: Kutotoa uchanganuzi sahihi wa mapato na matumizi kwa misimu tisa mfululizo.
-
Malipo ya Siri: Kudaiwa kumlipa aliyekuwa kocha wao Roberto Mancini kupitia mikataba ya siri kando na mshahara wake rasmi.
-
Kuvuja kwa Mapato ya Udhamini: Kusukuma fedha za wamiliki wa klabu kupitia makampuni ya udhamini ili kukwepa sheria za Financial Fair Play (FFP).
-
Kutoshirikiana na Uchunguzi: Mgomo wa kutoa nyaraka zinazohitajika kuanzia mwaka 2018 hadi 2023.
Katika kipindi hicho kinachochunguzwa, City ilipata mafanikio makubwa ikishinda mataji 8 ya EPL, Ligi ya Mabingwa Ulaya (UEFA Champions League), FA Cup 4, na Carabao Cup 7.
Msimamo wa Pep Guardiola na Viongozi wa City
Pamoja na tishio hilo, Mwenyekiti wa Man City, Khaldoon Al Mubarak, pamoja na Kocha Mkuu Pep Guardiola, wameendelea kusisitiza kuwa klabu hiyo haina hatia yoyote.
Guardiola aliwahi kueleza imani yake kubwa kwa viongozi wa timu hiyo:
“Kama walinidanganya, siku inayofuata sitakuwepo hapa. Lakini naamini 100% kuwa hatuna hatia. Hata tukishushwa daraja hadi League One, bado nitaobaki hapa kuipigania timu,” alisema Guardiola.
Hii si mara ya kwanza kwa City kukabiliwa na dhoruba ya kifedha; mwaka 2020 UEFA iliwafungia kushiriki michuano ya Ulaya kwa miaka miwili, lakini adhabu hiyo ilitenguliwa na Mahakama ya Usuluhishi wa Michezo (CAS).
Kwa sasa, ulimwengu wa soka unasubiri kwa hamu uamuzi wa mwisho wa hatua ya rufaa ya EPL, ambayo inatajwa kuwa kesi kubwa zaidi ya kifedha katika historia ya mchezo huo.
