Zanzibar Spice Boys Kwenda Brazil: Tazama Ratiba na Kundi Lao PQ CUP 2026!
Kikosi cha vijana chipukizi cha Zanzibar Spice Boys, kinachoundwa na wachezaji 18 wenye umri wa miaka 12 na 13 (U-13), kipo katika maandalizi ya mwisho kabla ya kusafiri kuelekea nchini Brazil kushiriki mashindano makubwa ya kimataifa ya soka la watoto yanayofahamika kama PQ CUP BRASIL 2026.
Mashindano hayo yanatarajiwa kutimua vumbi kuanzia Oktoba 10 hadi Oktoba 15, 2026, katika jimbo la Minas Gerais nchini Brazil.
Ratiba ya Safari na Kundi Walilopangwa
Zanzibar Spice Boys inatarajiwa kuondoka nchini Oktoba 5, 2026, kupitia Uwanja wa Ndege wa Kimataifa wa Sheikh Abeid Amani Karume (AAKIA) Zanzibar, na inatarajiwa kurejea nyumbani Oktoba 18, 2026.
Katika michuano hiyo ya kimataifa, Zanzibar Spice Boys imepangwa Kundi A (U-13) ikipambana na timu zifuatazo:
-
Clube Minas Gerais
-
Soccer Pro Betim
-
Polo Novo Horizonte Rio Vermelho
-
Vitinho Soccer Itabira
Mashindano haya yanashirikisha timu kutoka mataifa mbalimbali duniani ikiwemo Brazil, Ureno, na Argentina, jambo litakalowapa vijana hawa fursa ya kipekee ya kupata uzoefu wa kimataifa na kupima uwezo wao dhidi ya vipaji vingine duniani.
Kauli za Viongozi na Serikali
Mkuu wa Msafara wa timu hiyo, Balozi Mstaafu Abdulsamad Abdulrahim, amesisitiza kuwa safari hii ina maana kubwa zaidi ya matokeo ya uwanjani:
“Safari hii inalenga zaidi ya ushindani wa uwanjani, kwa kuwa inatoa fursa ya kukuza vipaji vya wachezaji chipukizi, kuwajengea kujiamini, nidhamu pamoja na kupata uzoefu wa mazingira mapya ya soka,” alisema Balozi Abdulsamad.
Naye Waziri wa Habari, Sanaa, Utamaduni na Michezo Zanzibar, Dk. Riziki Pembe Juma, alieleza kuwa ushiriki huu ni fursa kubwa ya kuitangaza nchi kimataifa:
“Ushiriki wenu utakuza vipaji vya watoto na kutangaza utamaduni na utalii wa Zanzibar kimataifa. Tunawatakia kila la kheri mkapeperushe vyema bendera ya Tanzania,” aliongeza Dk. Pembe.
