Siri ya Mashujaa Queens Kung’ara Ligi Kuu ya Wanawake Yafichuka!
KOCHA wa Mashujaa Queens, Rajabu Bwamkuu, ameweka wazi kuwa uwepo wa wachezaji wenye uzoefu ndani ya kikosi chake ndio silaha kuu inayoweza kuipa timu hiyo ushindani mkubwa katika msimu huu wa Ligi Kuu ya Wanawake.
Akizungumza kuhusu mwenendo wa kikosi chake, Bwamkuu alieleza kuwa wachezaji waliopitia mazingira magumu na ushindani wa juu wana nafasi kubwa ya kubadilisha upepo wa timu—si tu kupitia uwezo wao binafsi uwanjani, bali pia kupitia uzoefu wanaoujenga na kuwashirikisha wenzao.
Kikosi hicho kinajivunia nyota wenye uzoefu kama vile Maimuna Hamis ‘Mynaco’, Zainabu Hamis, na Gelwa Yona, ambao mchango wao unatajwa kuwa wa kuaminika katika safari ya Mashujaa Queens msimu huu.
“Ni dalili njema kwetu. Kucheza na timu ngumu kama JKT Queens na Yanga Princess kimetuonyesha namna gani tunakwenda kuonyesha ushindani thabiti kwenye ligi,” amesema Bwamkuu.
Muunganiko huu unampa kocha nafasi nzuri ya kupanga kikosi chenye uwiano mzuri wa nguvu za vijana na uzoefu wa wachezaji wakongwe, jambo linalozidisha ushindani wa namba ndani ya timu na kuimarisha ushirikiano.
Ikumbukwe kuwa Mashujaa Queens inaingia katika msimu huu mpya ikiwa na kumbukumbu nzuri ya kumaliza katika nafasi ya nne kwenye msimamo wa Ligi Kuu ya Wanawake msimu uliopita, huku wakisaka mafanikio makubwa zaidi.
