Alphonce Mabula Yanga
Habari za michezo

Tetesi za Usajili: Yanga Yarudi Tena kwa Kiungo Alphonce Mabula

Vardo November 20, 2026 8:30 am

UONGOZI wa klabu ya Yanga SC umeonekana kufufua upya mpango wa kuinasa saini ya kiungo wa kimataifa wa Tanzania, Alphonce Mabula Msanga, huku jina lake likitajwa kuingia tena kwenye rada za mabingwa hao wa Ligi Kuu Tanzania Bara kuelekea dirisha lijalo la usajili.

Taarifa za kurejea kwa Alphonce Mabula Yanga zimeibua mjadala mkubwa mitandaoni baada ya mchambuzi wa soka, Hans Rafael, kuchapisha picha ya kiungo huyo ikiwa na nembo ya klabu ya Yanga kwenye ukurasa wake wa kijamii, akiambatanisha na ujumbe mfupi lakini wenye uzito unaosomeka, “Yanga wamerudi kwa Mabula.”

Hii si mara ya kwanza kwa Wananchi kuhusishwa na nyota huyo. Katika dirisha lililopita la usajili, Yanga ilipambana kupata huduma yake, lakini dili hilo liligonga mwamba baada ya Mabula kuamua kutimkia nchini Algeria kujiunga na klabu ya JS Kabylie mnamo Agosti 2026 kwa uhamisho huru, mara baada ya kumaliza mkataba wake na Şamaxı FK ya Azerbaijan.

Hata hivyo, safari hii mabingwa hao wa kihistoria watakabiliwa na kibarua kizito mezani. Kiungo huyo mwenye uwezo mkubwa wa kucheza kama kiungo mkabaji (namba 6) na kiungo wa kati (namba 8) alisaini mkataba mrefu na JS Kabylie unaotarajiwa kumalizika Juni 2028. Hii ina maana kuwa Yanga italazimika kuvunja benki au kuingia kwenye mazungumzo rasmi ya kumnunua kutoka kwa miamba hiyo ya Algeria.

Kurejea kwa jina la Mabula kwenye mipango ya usajili ni habari njema inayoongeza hamasa kwa mashabiki wa Yanga, ambao wamekuwa wakitamani kuona kiungo huyo akirejea kucheza soka la nyumbani na kuongeza nguvu kwenye kikosi chao.

Kwa sasa, macho na masikio ya wadau wa soka yanaelekezwa kwa uongozi wa Jangwani kuona kama tayari wameshatuma ofa rasmi kwenda JS Kabylie au bado wapo katika hatua za awali za kumfuatilia nyota huyo ili kukamilisha usajili wake.

Polisi Tanzania vs Yanga: Vita ya Pointi Tatu Ushirika, Fadlu Apimwa Usajili Mpya Simba: Fei Toto Kutua Msimbazi, Kiungo Huyu Kutolewa Kama Chambo Azam FC