Wakati mashabiki wa Yanga wakiendelea kufurahia ujio wa beki wao Ibrahim Abdullah ‘Bacca’ kuna vita mpya mbili vimeanzishwa na ‘kitasa’ hicho katika vikosi viwili tofauti.
Baada ya kuanzishwa katika mchezo wa kwanza wa hatua ya makundi ya Kombe la Shirikisho Afrika dhidi ya US Monastir, Bacca ameanzisha vita mpya vya nafasi ndani ya kikosi chake cha Yanga.
Bacca katika mchezo huo alianzishwa sambamba na nahodha wa timu hiyo, Bakari Mwamnyeto huku akionyesha kiwango bora na kuisaidia Yanga kushinda mabao 2-0 ikitinga hatua ya robo fainali ya mashindano hayo.
Kiwango hicho cha Bacca sasa kitazusha vita mpya vya nafasi ya mabeki wa kati watatu wanaopishana katika eneo hilo wakiwamo Mwamnyeto na Dickson Job.
Katika mchezo dhidi ya Monastir Kocha wa Yanga, Nasreddine Nabi aliwashtua mashabiki wa timu hiyo baada ya kumweka benchi Job na kumwanzisha Bacca kwa mara ya kwanza katika mchezo huo wa kimataifa ilhali awali alikuwa akipewa nafasi chache za kucheza mechi za Ligi Kuu Bara na Kombe la Shirikisho la Azam.
Bacca dhidi ya Monastir alionyesha ubora wa juu akidhibiti vyema mipira ya juu aliporuka dhidi ya washambuliaji wa Monastir ambapo katika miruko 11 yote, mpira alicheza yeye.
Ingawa Nabi alifurahia ubora huo wa Bacca akimsifia kwa ukomavu aliouonyesha lakini alimtaka kubaki katika kiwango chake na kuongeza ushindani kati yake na mabeki wenzake.
“Ni mtu ambaye siku zote ana kiu ya kutaka kuwa bora, tulimpa nafasi na akafanya vizuri lakini kitu muhimu hapa ni kuwa na mwendelezo wa kucheza vizuri,” alisema Nabi.
