KASI YA SIMBA SC YAIBUA TAHARUKI COASTAL UNION, FIKIRINI ASEMA WALISHINDWA KUIZIMA

KOCHA mkuu wa Coastal Union, Fikirini Elias, ameeleza kwa uwazi sababu zilizochangia timu yake kupoteza mchezo wa Ligi Kuu Tanzania Bara dhidi ya Simba SC, katika pambano lililomalizika kwa mabao 2-1 kwenye Uwanja wa Mkwakwani, Tanga.

Coastal Union walianza mchezo kwa kasi na kuonyesha hamasa kubwa mbele ya mashabiki wao, ambapo waliweza kupata bao la kuongoza na kuibua matumaini ya kupata matokeo mazuri nyumbani.

Hata hivyo, furaha hiyo haikudumu kwa muda mrefu baada ya Simba SC kurejea mchezoni kwa nguvu na kubadili mwelekeo wa mchezo kupitia mashambulizi ya kasi na ya moja kwa moja.

Akizungumzia kipigo hicho, Fikirini amesema moja ya changamoto kubwa iliyowagharimu ni kasi na ubora wa safu ya ushambuliaji ya Simba SC, ambayo iliwaweka presha kubwa kila walipopoteza mpira.

Amefafanua kuwa timu yake ilishindwa kwa kiasi kikubwa kuhimili harakati za haraka za wapinzani wao, hasa katika mabadiliko ya kutoka kushambulia kwenda kujilinda.

“Ushambuliaji wa Simba ulikuwa bora sana. Unapowanyang’anya mpira wanarudi kwa kasi kubwa. Tulipokuwa tunapoteza mpira, ile hatua ya kurudi kuzuia ilikuwa ngumu, na ndio iliwapa nafasi ya kupata mabao,” amesema Fikirini.

Kocha huyo ameongeza kuwa pamoja na wachezaji wake kupambana na kuonyesha juhudi kubwa uwanjani, makosa ya safu ya ulinzi yaliwagharimu zaidi dhidi ya timu yenye makali kama Coastal Union.

“Mabeki wangu walikumbana na changamoto kubwa. Nawapongeza kwa juhudi walizofanya, lakini tumepata somo muhimu na sasa tunajiandaa kwa mechi zijazo,” ameongeza.

Matokeo hayo yanaifanya Coastal Union kuendelea kusaka uthabiti zaidi katika mechi zao zijazo, huku Simba SC wakiendeleza kasi yao katika mbio za ubingwa wa ligi.