SIMBA SC YARUDI UPYA JUMATATU IJAYO, MAANDALIZI MAPYA YAANZA MOTO
KIKOSI cha Simba SC kimeingia katika mapumziko mafupi kufuatia kumalizika kwa mchezo wao dhidi ya Dodoma Jiji FC, huku wachezaji wakipewa nafasi ya kurejea majumbani kwao kwa ajili ya kupumzika na kurejesha nguvu kabla ya kuanza maandalizi ya mechi zilizobaki msimu huu.
Meneja wa Idara ya Habari na Mawasiliano wa Simba SC, Ahmed Ally, amesema mara baada ya mchezo huo, benchi la ufundi kwa kushirikiana na uongozi wa klabu uliamua kuvunja rasmi kambi ili kuwapa wachezaji muda wa kupata nafuu baada ya ratiba ngumu ya mashindano waliyoipitia katika siku za karibuni.
Amesema mapumziko hayo ni sehemu ya mpango maalum wa kuhakikisha wachezaji wanarejea wakiwa na nguvu mpya, utimamu wa mwili pamoja na utulivu wa kiakili kuelekea hatua za mwisho za msimu ambazo zina ushindani mkubwa na zinahitaji umakini wa hali ya juu.
“Baada ya mchezo wetu dhidi ya Dodoma Jiji FC pale pale tukavunja kambi na wachezaji wakasambaa kwenda majumbani kwao kupumzika,” amesema Ahmed akielezea hali ya kikosi hicho baada ya mchezo wa ligi.
Ahmed amesema Simba inatarajia kurejea rasmi kambini siku ya Jumatatu ijayo kwa ajili ya kuanza maandalizi ya michezo mingine iliyopo mbele yao, huku wachezaji ambao hawajaitwa katika timu za taifa wakitarajiwa kuanza mazoezi mara moja.
Kwa upande wa nyota waliopo kwenye majukumu ya timu za taifa, Ahmed amesema wataungana na wenzao baada ya kumaliza ratiba zao za kimataifa, hali inayoonyesha ubora wa kikosi cha Simba ambacho kina idadi kubwa ya wachezaji wanaoaminika katika timu mbalimbali za taifa.
“Mungu akijalia tutarejea tena uwanjani siku ya Jumatatu kwa wachezaji wote ambao hawapo katika majukumu ya timu za taifa. Wenyewe wataingia kambini kwa ajili ya kujiandaa na mechi zingine zilizopo mbele yetu,” amesema Ahmed.
