MOALLIN FUNGUKA SIRI YA YANGA KUTWAA TENA UBINGWA
KATIKA hatua za mwisho za mbio za ubingwa wa Ligi Kuu Tanzania Bara, Kaimu Kocha Mkuu wa Yanga SC, Abdi Hamid Moallin, amesema kikosi chake kimejipanga kuhakikisha kinamaliza msimu kwa nguvu huku kikitetea taji lao kwa kiwango bora zaidi.
Moallin amesema ushindani wa ubingwa umeendelea kuwa mkubwa baada ya mchezo dhidi ya Dodoma Jiji, hasa kutokana na tofauti ndogo ya alama kati ya timu zinazowania taji hilo. Hali hiyo imeifanya Yanga kuongeza umakini katika kila mchezo uliobaki.
Kocha huyo ameweka wazi kuwa kwa sasa nguvu kubwa zimeelekezwa katika kuhakikisha timu inabaki imara hadi mwisho wa msimu, akisisitiza kuwa hawawezi kudhibiti matokeo ya wapinzani wao bali wana uwezo wa kudhibiti kiwango chao uwanjani.
“Tumefika mwisho wa msimu na tofauti ya alama ni mbili tu baada ya mchezo wa Dodoma Jiji. Juhudi yetu kubwa sasa ni kuhakikisha tunamaliza ligi tukiwa imara zaidi,” amesema Moallin.
Ameongeza kuwa katika harakati za kutetea ubingwa wao, jambo la msingi ni kuhakikisha wanashinda mechi zao zote zilizobaki badala ya kufuatilia kinachoendelea kwa wapinzani wao.
“Hatumuogopi mtu yeyote zaidi yetu wenyewe, kwa sababu hatuwezi kutawala wapinzani wetu, lakini tunaweza kutawala mchezo tunaoucheza na namna tunavyoingia uwanjani,” ameongeza.
Sambamba na hilo, Moallin amewataka wachezaji wake kutokubali kuyumbishwa na presha za nje, akisisitiza umuhimu wa kuendelea kupambana kwa nidhamu, ari na umoja katika kila mchezo.
Amefafanua kuwa siri ya kubaki mabingwa ipo kwenye kushinda mchezo mmoja baada ya mwingine, akiamini kuwa iwapo wataendelea na kiwango hicho, hakuna kitakachowazuia kutetea ubingwa wao wa Tanzania Bara.
