USAJILI WAZIDI KUWAKA YANGA, AZAM ZAFANYA MAPINDUZI SOKONI
WAKATI zikiwa zimesalia mechi tano pekee kumaliza msimu wa Ligi Kuu Tanzania Bara, anga la soka limeanza kupata joto jipya nje ya uwanja, huku vilabu vikubwa vikiingia sokoni mapema kuwania saini za wachezaji muhimu kwa ajili ya msimu ujao.
Katika dirisha hilo la awali la usajili, Yanga SC na Azam FC zimejikuta zikitazamana uso kwa uso katika vita ya kimyakimya ya kumsaka kiungo mshambuliaji wa FC Rangers, Henoc Molia, ambaye amekuwa akifuatiliwa kwa ukaribu kutokana na kiwango chake cha kuvutia.
Taarifa zinaeleza kuwa Yanga SC tayari ipo katika hatua za mwisho za mazungumzo, ikiwa na mpango wa kumleta Molia kuongeza nguvu katika safu yao ya ushambuliaji kuelekea msimu ujao, ambapo wanataka kuendeleza ubabe wao wa ushindani.
Lakini safari yao haijawa rahisi, kwani Azam FC nao wameingia kwa nguvu katika kinyang’anyiro hicho, wakiripotiwa kuwa na nia ya kumrejesha mchezaji huyo Chamazi ili kuongeza ubora wa kikosi chao kinachojengwa upya kwa msimu ujao.
Inaelezwa kuwa Azam FC walipata ushauri wa kiufundi kutoka kwa kocha wao mkuu Florent Ibenge, ambaye aliona umuhimu wa kuimarisha safu ya ushambuliaji kwa kuongeza nguvu ya Henoc Molia, jambo lililowasukuma haraka kuanza mawasiliano.
Awali, mchezaji huyo alikuwa katika mfumo wa mkopo akitakiwa kwenda Lupopo kutoka FC Rangers, lakini Azam walipofuatilia kwa ukaribu waligundua kuwa hakuwahi kujiunga na klabu hiyo kwa wakati huo, na hivyo kuamua kurejea chanzo cha mkataba wake.
Baada ya kugundua hilo, Yanga SC pia hawakubaki nyuma, ambapo nao walielekea moja kwa moja FC Rangers kuanza mazungumzo, hivyo sasa vita ya usajili imehamia rasmi mezani, huku kila upande ukijaribu kumshawishi Molia kuwa sehemu ya mipango yao ya msimu ujao.
