DIARRA AKITELEZA TU, KASSALI TAYARI KUMSHUSHA KILELENI

Mbio za kuwania tuzo ya kipa bora wa Ligi Kuu Tanzania Bara msimu wa 2025/26 zimechukua sura mpya huku ushindani wa makipa ukizidi kupamba moto kadri ligi inavyokaribia tamati.

Kwa sasa, kipa wa Yanga SC, Djigui Diarra, bado anaongoza kwenye orodha ya makipa wenye clean sheet nyingi baada ya kufikisha mechi 13 bila kuruhusu bao.

Hata hivyo, presha kubwa ipo nyuma yake kutoka kwa kipa wa Simba SC, Mahamadou Kassali, ambaye ameendelea kung’ara langoni na kufikisha clean sheet 12, tofauti ya mchezo mmoja pekee dhidi ya Diarra.

Ushindani huo umeifanya vita ya ubora langoni kuwa kali zaidi, kwani kosa dogo tu kutoka kwa Diarra linaweza kumpotezea nafasi ya kubaki kileleni, huku Kassali akiwa tayari kutumia nafasi hiyo kupanda juu.

Katika nafasi ya tatu yupo kipa wa Azam FC, Aishi Manula, aliyefikisha clean sheet 11 na kuonyesha dalili za kurejea kwenye kiwango chake bora. Uwepo wake umeongeza ugumu katika mbio hizo za kuwania heshima ya kuwa kipa bora wa msimu.

Makipa wengine wanaofuatia ni Jean Joel wa TRA United mwenye clean sheet 10, Zuberi Foba wa Azam FC mwenye nane, pamoja na Eric Johora wa Mashujaa FC aliyefikisha saba.

Kwa upande wa Pamba Jiji FC, Yona Amosi naye ameendelea kuvutia kwa kiwango chake kizuri langoni na kuingia kwenye orodha ya makipa wanaofanya vizuri msimu huu.

Kadri ushindani wa ligi unavyoendelea kuwa mkali, vita ya clean sheet kati ya Diarra na Kassali imeendelea kuvuta hisia za mashabiki wengi wa soka nchini, huku kila mchezo uliobaki ukiwa na uzito mkubwa katika kuamua nani ataibuka kipa bora wa msimu.