Kiungo Yanga Afunguka Ukweli Msimu Mpya Na Hatma Yake
KIUNGO mshambuliaji wa Yanga, Max Nzengeli, ameweka wazi kuwa bado ana furaha kuendelea kuitumikia klabu hiyo, huku akisisitiza kuwa hatma ya mustakabali wake ipo mikononi mwa viongozi wa timu, Rais Eng. Hersi Ally Said na Mwenyekiti wa Kamati ya Usajili, Arafat Haji.
Nyota huyo amesema kwa sasa hana sababu ya kuzungumzia suala la kuondoka Yanga, akieleza kuwa viongozi wa klabu ndio wenye mamlaka ya kufanya maamuzi kuhusu mustakabali wake kuelekea msimu mpya wa mashindano.
“Nipo sana Yanga. Suala la kuondoka Yanga lipo mikononi mwa Arafat Haji na Hersi Said,” amesema Nzengeli, akionesha imani yake kwa uongozi wa klabu hiyo.
Mbali na kuzungumzia mustakabali wake, kiungo huyo pia alirejea baadhi ya kumbukumbu za msimu uliopita, akitaja mechi mbili za dabi dhidi ya Simba kuwa ndizo zilizokuwa ngumu zaidi kwake kutokana na ushindani mkubwa uliokuwapo uwanjani.
Amesema michezo hiyo ilikuwa na presha kubwa, ilihitaji umakini wa hali ya juu na kila mchezaji alilazimika kupambana kwa nguvu zote ili kuisaidia timu kupata matokeo mazuri.
“Mechi mbili za Simba bado hazijanitoka katika akili yangu, ni mechi ngumu sana,” amesema Nzengeli, amesisitiza kuwa dabi hiyo ndiyo yenye ushindani mkubwa zaidi katika soka la Tanzania.
Kauli za Nzengeli zinakuja wakati Yanga ikiendelea na maandalizi ya msimu mpya, huku mashabiki wakisubiri kwa hamu kujua hatma ya baadhi ya nyota wa kikosi hicho.
Hata hivyo, kauli yake imeongeza matumaini kwa Wananchi kuwa bado yupo tayari kuendelea kuipigania klabu hiyo ikiwa viongozi wataamua kumbakisha.
