Simba Yamng’ang’ania Kasali, Barker Atoa Sababu Ya Kumbakiza

UONGOZI wa Simba SC umeamua kuendelea na huduma za kipa wake Djibrila Kasali baada ya kufikia makubaliano ya kumuongezea mkataba mpya, hatua inayomfanya mlinda mlango huyo kuendelea kuwa sehemu ya kikosi cha Wekundu wa Msimbazi kuelekea msimu wa 2026/27.

Uamuzi huo umefikiwa baada ya benchi la ufundi la Simba chini ya kocha mkuu Steve Barker kuridhishwa na uwezo, nidhamu na mchango wa Kasali tangu alipojiunga na timu hiyo. Kipa huyo ametajwa kuwa miongoni mwa wachezaji wanaoaminiwa katika mipango ya muda mrefu ya klabu hiyo.

Taarifa zinaeleza kuwa Barker ndiye aliyependekeza jina la Kasali kuendelea kubaki ndani ya kikosi, akiamini kuwa uwepo wake utaongeza ushindani katika nafasi ya ulinzi wa lango na kutoa chaguo bora kwa timu katika msimu ujao.

Kwa mujibu wa taarifa hizo, Kasali anatarajiwa kusaini mkataba mpya wa miaka miwili zaidi na kuendelea kuilinda Simba, huku uamuzi huo ukifanya klabu hiyo kusitisha mipango ya kutafuta kipa mwingine katika dirisha hili la usajili.

Hatua hiyo inaonyesha mkakati wa Simba wa kuhifadhi wachezaji ambao wameonyesha uwezo na kuendelea kujenga kikosi chenye ushindani mkubwa kwa ajili ya mashindano ya ndani pamoja na yale ya kimataifa.

Baada ya kufunga dili la kumbakiza Kasali, Simba sasa itaelekeza nguvu katika maeneo mengine yenye uhitaji wa maboresho, huku benchi la ufundi likiendelea na mipango ya kukiandaa kikosi imara kitakachokabiliana na changamoto za msimu wa 2026/27.