Simba SC

Mo Dewji Wazi: Aweka Mezani Bilioni 30 Kuisuka Simba Upya

Vardo August 8, 2026 7:37 pm

RAIS wa Simba SC, Mohammed Dewji ‘Mo Dewji’, ameweka mezani pendekezo kubwa la uwekezaji wa Shilingi bilioni 30 kwa ajili ya ujenzi na uboreshaji wa miundombinu ya kisasa ya klabu hiyo, huku akisisitiza yuko tayari kuanza kazi mara moja ikiwa Bodi ya Wadhamini itatoa ruhusa.

Mo Dewji aliyabainisha hayo wakati wa kilele cha tamasha la Simba Day lililofanyika kwenye Uwanja wa Uhuru jijini Dar es Salaam. Alieleza kuwa mpango huo tayari uko mikononi mwa Bodi ya Wadhamini ya Simba na hivi sasa anasubiri majibu yao tu ili atekeleze azma hiyo.

Akiweka wazi nia yake ya kuibadilisha Simba, Mo Dewji alisema kuwa akipata baraka za bodi hiyo, hatazima wala kupoteza muda, bali yuko tayari kuanza utekelezaji wa miradi hiyo mara moja ili kuifanya klabu hiyo kuwa na miundombinu itakayoiwezesha kushindana na miamba mingine barani Afrika.

Miradi Itakayotekelezwa na Sh Bilioni 30 za Mo Dewji:

Kituo cha Kisasa cha Bunju: Ujenzi wa kompleks ya kisasa ya soka kwa ajili ya timu ya wakubwa na vijana.
Viwanja vya Ndani vya Mazoezi: Kuweka miundombinu ya kisasa ya mazoezi ili kuongeza viwango vya wachezaji.
Vituo vya Kurejesha Nguvu (Recovery Centers): Huduma za kisasa za matibabu na afya baada ya mechi ngumu.
Kambi za Malazi: Kambi za kijiji cha michezo kwa ajili ya wachezaji na benchi la ufundi.
Simba Queens na Mfumo wa Vijana: Kuwekeza zaidi kwenye timu ya wanawake na kuanzisha programu za kukuza vipaji vya vijana.

Ushirikiano na Klabu ya Ujerumani Kukuza Vipaji

Katika hatua nyingine ya kuimarisha soka la vijana, Mo Dewji alieleza kuwa tayari amefanya mazungumzo na klabu moja nchini Ujerumani. Mipango hiyo inalenga kuleta makocha na maskauti watakaosaidia kuibua na kukuza vipaji vipya vitakavyoitumikia Simba na kufikia viwango vya kimataifa.

“Ndoto yangu kubwa bado ni kuiona Simba ikitwaa ubingwa wa Afrika. Mafanikio haya hayawezi kupatikana kwa bahati bali kwa uwekezaji wa stahiki na maandalizi ya muda mrefu. Tumeshindana na timu kubwa na sasa lazima tupige hatua inayofuata ya kucheza fainali na kubeba kombe,” alisema Mo Dewji.

Mo Dewji alimalizia kwa kuwataka wanachama na mashabiki wa Simba kuendelea kushikamana na viongozi wao, akisisitiza kuwa ukubwa wa Simba unachangiwa na umoja wa watu wake na wala si viwanja au makombe pekee.