“Mtalia Sana!” – Manqoba Atuma Onyo Kali Yanga Ikiichapa Coastal Union 4-1

Kocha Mkuu wa Yanga, Manqoba Mngqithi, ametoa onyo kali kwa watu wanaotafuta madhaifu ya timu hiyo, akisisitiza kuwa wataishia kuvuna majuto kutokana na mafanikio ambayo kikosi chake kimejipanga kuyapata msimu huu.

Kauli hiyo imekuja mara baada ya Yanga kuibuka na ushindi mnono wa mabao 4-1 dhidi ya Coastal Union, katika mchezo wa Ligi Kuu Tanzania Bara uliopigwa kwenye Uwanja wa KMC Complex, Mwenge, Dar es Salaam. Kocha huyo alieleza kuwa pamoja na matokeo hayo mazuri, timu hiyo bado ipo kwenye hatua ya kujengwa na kuimarika zaidi.

Licha ya kwamba msimu ndio kwanza umeanza, Manqoba ameeleza kuridhishwa na namna wachezaji wake walivyotawala mchezo na kutumia vyema nafasi zilizopatikana kupata ushindi huo wa kishindo.

Mipira ya Pembeni na Shinikizo kwa Washambuliaji

Akichambua mbinu za mchezo huo, Manqoba alisema Yanga ilikuwa na fursa kubwa ya kutumia mipira ya pembeni kupeleka mashambulizi ya moja kwa moja ndani ya boksi, lakini mara kadhaa wachezaji walipendelea kucheza pasi fupi na michanganyiko badala ya kumtafuta mshambuliaji aliyekuwa kwenye nafasi.

Pia alisisitiza umuhimu wa washambuliaji wake kuanza kufunga mapema msimu huu, akimtolea mfano mshambuliaji Peter Shalulile ambaye bado hajafungua akaunti yake ya mabao. Kwa mujibu wa Manqoba, mabao yataongeza kujiamini na kupunguza presha ya mwanzo wa msimu, jambo litakalowasaidia kuzingatia jukumu lao kuu la kuweka mpira kimani.

“Tulieni, Mtalia Sana”

Manqoba hakuchelea kuonyesha kutoridhishwa kwake na watu wanaotafuta kila sababu ya kuiona Yanga ikipitia kipindi kigumu, akisisitiza kuwa timu hiyo haijavurugika wala kufa kama wengi wanavyotamani kuamini.

“Timu ilishuka kiwango, lakini haikufungwa. Timu ilishinda vizuri. Je, mnatafuta makosa? Je, ni miongoni mwa wale wenye hasira wanaotaka timu hii isifanikiwe? Kwa sababu tutafanikiwa. Tulieni, mtalia sana kama mnafikiri timu hii itakuwa na matatizo, kwa sababu timu hii itashinda mechi nyingi,” alisema Manqoba.

Sifa Kemkem kwa Shadrach Boka

Katika hatua nyingine, kocha huyo alimwagia sifa beki Shadrach Boka kwa kiwango cha juu alichoonyesha uwanjani. Alieleza kuwa Boka alionyesha nguvu, ushindani wa hali ya juu na akili kubwa ya mpira, licha ya changamoto chache zilizojitokeza katika hatua za mwisho za mchezo.

Ushindi huo dhidi ya Coastal Union unaifanya Yanga kuendelea na kasi nzuri katika msimu mpya wa Ligi Kuu, huku Manqoba akihitimisha kwa kusema kuwa kazi ndio kwanza imeanza na kikosi hicho kitaendelea kuimarika mchezo hadi mchezo.