Ligi Kuu Tanzania Bara Leo: Vita ya Pointi Sheikh Amri Abeid & Mkwakwani!
Ligi Kuu Tanzania Bara inaendelea leo Jumamosi kwa mechi mbili za kukata na shoka katika viwanja vya Sheikh Amri Abeid jijini Arusha na Mkwakwani jijini Tanga.
Polisi Tanzania v Mbeya City (Saa 10:00 Jioni)
Pale Uwanja wa Sheikh Amri Abeid, Polisi Tanzania itakuwa na dakika 90 za kusaka matokeo chanya baada ya kupoteza mechi mbili mfululizo zilizopita.
Polisi ilianza msimu kwa kasi nzuri kwa kutoa sare ya 1-1 dhidi ya Azam FC na kushinda michezo miwili iliyofuata, kabla ya kukumbana na wakati mgumu dhidi ya Singida Black Stars na Coastal Union.
Kocha wa Polisi Tanzania, Mbwana Makata, ameweka wazi maandalizi yao:
“Ni kweli hatujafanya vizuri kwenye mechi zilizopita ingawa tulicheza vizuri kidogo. Tumeyafanyia kazi mapungufu yote tuliyoyaona na tunataka kushinda leo ili turudishe mwendo wetu mzuri.”
Kwa upande wa Mbeya City, kikosi hicho kinaonekana kuanza kupata mwelekeo baada ya kupoteza mchezo wa kwanza, ambapo imeshinda mechi tatu na kutoa sare moja dhidi ya TRA United.
Kocha wa Mbeya City, Salum Mayanga, amesema:
“Tunakwenda kucheza mchezo wa pili mfululizo ugenini dhidi ya timu nzuri inayotaka matokeo nyumbani. Tumejipanga kikamilifu kukabiliana na ugumu huo.”
Coastal Union v JKT Tanzania (Saa 1:00 Usiku)
Mchezo wa pili utapigwa usiku ambapo Coastal Union itakuwa nyumbani ikiwa na morali ya ushindi wa ugenini dhidi ya Polisi Tanzania, ikialika JKT Tanzania.
Kocha wa Coastal Union, Fikiri Elias, ameeleza maandalizi yao:
“JKT Tanzania ni timu nzuri na inafundishwa na kocha mzuri. Tutakuwa nyumbani na tumejipanga kusaka ushindi mwingine, ingawa itakuwa mechi ngumu kwa pande zote.”
JKT Tanzania nayo inaingia uwanjani ikiwa kwenye kiwango kizuri baada ya kuanza msimu taratibu. Baada ya kuangusha pointi nane kwenye mechi tatu za kwanza, imefanikiwa kushinda michezo yake miwili ya mwisho.
Kocha wa JKT Tanzania, Ahmad Ally, amekiri ugumu wa mchezo huo:
“Mechi zote ni ngumu, lakini kuna ugumu wa pekee tunapokutana na Coastal Union wakiwa nyumbani. Maandalizi yetu yamekwenda vizuri na tupo tayari kwa mapambano.”
