Said Mundi: Maisha ya Ujerumani, Ngumi na Mbinu za Kupambana na Ugumu wa Maisha
Bondia wa Kitanzania, Said Mundi ‘Kiboko ya Wabishi’, anayepigana uzani wa kilo 69, ameonyesha mfano wa kuigwa baada ya kuamua kuitumia vyema fursa ya kimaisha nchini Ujerumani ili kujiwekea msingi imara kiuchumi kabla ya nguvu za ujana kumuishia.
Katika mahojiano yake, Kiboko ya Wabishi anafunguka kuwa safari yake ya kwenda Ujerumani ililenga mambo mawili makuu: kuendeleza taaluma yake ya ngumi za kulipwa na fursa za ajira. Kwa sasa, mbali na mazoezi, anafanya kazi ya kusambaza bidhaa za wateja wa mtandaoni kupitia kampuni moja nchini humo.
“Maisha yanahitaji kujitoa na kuthubutu. Kazi ya ngumi huwezi kuifanya muda wote, kuna wakati utachoka. Ndio maana nikiwa bado kijana, nikiona fursa ya kunipa pesa lazima niifanyie kazi. Bidii, nidhamu na kujitambua ndivyo vinavyonipa mafanikio,” anasema Mundi.
Sheria na Ugumu wa Maisha Nchini Ujerumani
Akizungumzia utaratibu wa kuishi na kufanya kazi nchini Ujerumani, Said Mundi anaeleza kuwa mgeni yeyote anapaswa kukaa nchini humo kwa miezi sita kabla ya kuruhusiwa rasmi kufanya kazi za kujiingizia kipato.
Ili uruhusiwe kufanya kazi, lazima upitie hatua zifuatazo:
-
Kutafuta Kazi Mwenyewe: Baada ya kupata mkataba, unawasilisha serikalini kwa ajili ya ukaguzi.
-
Kukaguliwa kwa Safari Yako: Serikali inakagua njia uliyotumia kuingia nchini humo.
-
Vipimo vya Afya: Unafanyiwa ukaguzi wa kina wa afya kabla ya kupewa kibali rasmi cha kufanya kazi.
Mundi anasimulia kuwa alipata viza ya kwenda Ujerumani kupitia mwaliko wa bondia rafiki yake wa nchini humo. Pia anaongeza kuwa kujifunza lugha ya Kijerumani ni sharti muhimu sana, kwani Kiingereza kinazungumzwa kwenye maeneo machache tu. Kwa sasa amesoma lugha hiyo kwa miezi minne, jambo linalomsaidia sana kuwasiliana na wateja wake.
Kuhusu gharama za maisha, Mundi anakiri kuwa ni za juu:
-
Kodi ya Chumba: Inafikia karibu Sh2.4 milioni za Kitanzania kwa mwezi.
-
Chakula: Matumizi ya kujibana sana kwa siku ni takribani Sh90,000.
Ili kupanda ulingoni nchini Ujerumani, bondia anatakiwa kukaa miaka miwili, kuwa na bima ya afya, na kufanya vipimo kamili vya afya ili kuhakikisha yuko timamu. Mundi tayari amekamilisha vipimo hivyo na ana bima ya afya inayomruhusa kuendelea na majukumu yake.
Safari Yake Katika Mchezo wa Ngumi za Kulipwa
Tangu anze kucheza ngumi za kulipwa mwaka 2011, Said Mundi anakiri kuwa mchezo huo umekuwa nguzo kuu ya maisha yake na umemfungulia milango mingi, ikiwemo kusafiri katika nchi mbalimbali kama Uingereza.
Kabla ya kuchagua ngumi, Mundi alijaribu kucheza mpira wa miguu katika ngazi za chini (akicheza namba zote kasoro golikipa), lakini aliona itakuwa vigumu kupata mafanikio na ndipo alipohamia kwenye ngumi.
Anatoa wito kwa vijana kuutazama mchezo wa ngumi kama ajira rasmi yenye heshima na si uhuni.
Mabondia Anao wakubali Nchini Tanzania
Mundi amewataja mabondia wa Kitanzania anaowakubali sana kutokana na kiwango na nidhamu yao:
-
Hassan Mwakinyo: Anavutiwa na ubora wake ulingoni pamoja na usmart wake kimaisha unaopaswa kuigwa na vijana.
-
Mabondia Mafundi: Fadhili Majiha, Ibrahim Mafia, Yohana Mchanja, Yusuf Changalawe, na Ibrahim Class.
Takwimu za Said Mundi (BoxRec)
Kwa mujibu wa takwimu za BoxRec, Said Mundi amecheza jumla ya mapambano 40:
-
Ushindi: Mapambano 29
-
Kupoteza: Mapambano 10
-
Sare: Pambano 1
Baadhi ya mapambano yake ya hivi karibuni ni pamoja na dhidi ya Adel El Garmaoui (Ujerumani – Mei 2025), Jay Jay Ngotiko (Tanga – Novemba 2024), na Salehe Maafuzu (Tanga – Januari 2024).
