KOCHA MBRAZILI SIMBA AANZA NA KIBU DENIS…AOMBA KUJUA URAIA WAKE…MKUDE NAYE MHH…

WAKATI wadau na mashabiki wa soka wakimkataa mshambuliaji wa Simba, Kibu Denis, kwa kocha mkuu wa timu hiyo, Mbrazili Robertinho Oliviera mambo ni tofauti baada ya kuliulizia faili ya nyota huyo akitaka kujua uraia na umri wake.

Kocha huyo alikuwa jukwaani wakati Simba ikifungwa bao 1-0 na Mlandege katika mechi ya Kombe la Mapinduzi 2023, ambayo Simba ilichezesha asilimia kubwa ya kikosi cha pili, muda mchache baada ya kutambulishwa na uongozi jijini Dar es Salaam.

Akiwa jukwaani alikuwa na daftari alilokuwa akiandika alichokiona kinamvutia kupitia wachezaji hao, chanzo cha kuaminika kutoka ndani ya Simba kinasema kuwa mara baada ya mechi alithibitisha kuvutiwa na wachezaji wanne tu kati ya 11 waliocheza.

Wachezaji hao 11 ni wale wasio na nafasi katika kikosi cha kwanza na kocha huyo alikaririwa na chanzo chetu akisema timu ilicheza vibaya ilikosa nidhamu ya kujilinda ndiyo maana waliambulia matokeo mabaya yaliyowavua taji ililokuwa ikilishikilia tangu msimu uliopita.

Chanzo hicho, kilisema kati ya mastaa wanne aliovutiwa na uwezo wao uwanjani ni Kibu aliyeulizia umri wake na baada ya kuambiwa ni mchezaji aliye na umri chini ya umri wa miaka 30, alifurahi zaidi na kuweka wazi kuwa ni bonge la mchezaji aliyekosa kocha wa kumtengeneza.

“Nimefurahi kwa umri wake unafaa, nitafanya kazi naye kwa kuhakikisha anakuwa bora. Je ni raia au ni mchezaji wa kigeni?” Inaelezwa kocha alihoji na alipoambiwa ni Mtanzania alisifu kuwa ana kipaji kitakacholisaidia taifa.

Alisema Kibu ni mchezaji mzuri, anayetumia miguu yote miwili atahakikisha anauthibitishia umma kile alichokiona kikiweza kuthibitishwa kupitia miguu yake.

Mchezaji mwingine aliyeuliziwa na Robertinho ni Jonas Mkude, aliyemsifia ni kiungo mzuri mkabaji anaweza kuisaidia timu yake ambayo amegundua kuwa ni timu iliyokosa nidhamu ya ukabaji na inacheza kwa kushambulia zaidi na kusahau kulinda lango lao.

Chanzo chetu kilimkariri kocha huyo akimtaja kijana aliyetoka timu ya vijana Michael Joseph, aliyesema ameona ana kitu kwa namna ya kujua kipi cha kufanya na kwamba amekosa watu wa kumsaidia kuwa bora zaidi na alivyocheza.

Kocha huyo mwenye falsafa ya soka la kujilinda zaidi na kushambulia alimtaja pia Kennedy Juma, aliyecheza beki ya kati aliyesema ni aina ya wachezaji anaotamani kuwa nao ndani ya timu.

“Kennedy anakaba kwenye nafasi ni mchezaji ambaye hatumii nguvu amefanya kazi nzuri uwanjani ana umbo zuri na ni mrefu ana kila sifa ya kuitwa beki, napenda timu yenye wachezaji wa aina yake nitaendelea kuwaangalia zaidi nijue na mapungufu yao,” alisema kocha huyo mpya.