ANTHONY TRA BI TRA AWINDWA NA SIMBA…NI BEKI WA KATI

Simba SC ipo kwenye mazungumzo na beki wa kati wa ASEC Mimosas, Antony Tra Bi Tra (25) ili kuziba pengo la Henock Inonga anayetajwa uondoka ndani ya klabu hiyo.

Inonga amebakiza mwaka mmoja kuitumikia Simba amehudumu kwenye timu hiyo kwa misimu miwili ameisaidia Simba kucheza hatua ya robo fainali Caf.

Kwa hali ilivyo hivi sasa kati ya Inonga na Simba, hakuna makubaliano ya mchezaji huyo kuendelea kukipiga Simba, kwani tayari amepata timu nyingine.

Awali alikuwa anatajwa kutua FAR Rabat ya Morocco huenda dili hilo likafa baada ya klabu ya FC Metz inayoshiriki Ligi 2 ya Ufaransa kuingilia kati na kumtaka.

Inaelezwa kuwa, dili la beki huyo kutoka DR Congo kwenda FAR Rabat limeota mbawa baada ya aliyekuwa kocha wa timu hiyo, Nasreddine Nabia aliyekuwa anamhitaji anajiandaa kutua Kaizer Chiefs ya Afrika Kusini.

Inonga ambaye hajatumika katika mechi kadhaa za mwishoni mwa msimu kwa kilichoelezwa kuwa majeruhi, japo taarifa nyingine zinasema ni ‘mgomo’ baridi aliokuwanao kutokana na kutuhumiwa tangu pambano la Dabi ya Kariakoo ambapo Simba ilichapwa 5-1 na ziliporudiana ikafungwa tena 2-1, huku beki huyo akitumika kwa muda mchache na kutoka akionekana kuumia kabla ya Simba kufungwa bao la kwanza.

Baada ya hapo Inonga hakuwahi kuoenekana tena akicheza mechi yeyote ya Simba hadi msimu ulipomalizika.