Usajili wa Simba SC Bado Haujafungwa: Ahmed Ally Afunguka

DAR ES SALAAM: MENEJA wa Idara ya Habari na Mawasiliano wa Simba SC, Ahmed Ally, ameweka wazi kuwa klabu hiyo bado haijafunga rasmi pazia la usajili, akisisitiza kuwa madaktari na benchi la ufundi wakiendelea na tathmini, nafasi ya kuongeza vifaa vipya bado ipo wazi.

Akizungumza kuhusu mwenendo wa usajili wa Simba SC, Ahmed ameeleza kuwa si sahihi kwa klabu yoyote kujitangazia kuwa imekamilisha usajili mapema, wakati dirisha likiwa bado liko wazi na maandalizi ya msimu (Pre-season) yanaendelea.

“Usajili haujakamilika bado. Utakamilika rasmi pale dirisha litakapofungwa. Unaweza kusema umekamilisha kila kitu, lakini baada ya mazoezi au kucheza mechi chache za maandalizi ukabaini kuna eneo linahitaji kuongezewa nguvu,” alisema Ahmed Ally.

Mbinu za Simba Kuelekea Msimu Mpya

Ahmed amefafanua kuwa msimamo wa uongozi wa Simba si kutangaza kuwa kila kitu kimekamilika, bali ni kuhakikisha wanaunda kikosi imara na chenye ushindani mkubwa kuelekea msimu ujao.

Hata hivyo, amewatoa hofu mashabiki wa Msimbazi kwa kueleza kuwa kazi kubwa na nzuri imeshafanyika hadi sasa.

Hatua zinazofuata ndani ya kikosi cha Simba:

• Ushikamano: Kuwapa nafasi wachezaji wapya kuzoeana na waliokuwepo.

• Mfumo: Kuingiza wachezaji kwenye mfumo na mbinu mpya za benchi la ufundi.

• Wachezaji Wanaoondoka: Uongozi umekamilisha mipango yote inayowahusu wachezaji waliokuwa kwenye orodha ya kuachwa.

Ujumbe kwa Mashabiki wa Simba

“Kwa asilimia kubwa tayari tumekamilisha kazi ya usajili. Ikitokea kutakuwa na nyongeza yoyote kulingana na mahitaji tutawajulisha, lakini tuna imani kubwa wachezaji tuliowasajili watatupa mafanikio tunayoyatarajia,” alimalizia Ahmed.