Mo Dewji Karejea Simba SC: “Tumerudi Kurejesha Heshima 2026/27”

Rais wa Heshima wa Simba SC, Mohammed Dewji (Mo), ametangaza rasmi kurejea kuisimamia klabu hiyo kwa ukaribu zaidi, akibainisha kuwa msukumo mkubwa umetokana na presha ya kuona klabu hiyo ikipoteza makali na ushindani wake wa kawaida.

Mo amesisitiza kuwa lengo kuu la uamuzi huo kwa msimu mpya wa 2026/27 ni kuhakikisha Wekundu wa Msimbazi wanarejesha heshima yao ndani na nje ya uwanja.

Presha ya Mashabiki na Anguko la Misimu Mitano

Kauli hii ya Mo Dewji inakuja katika kipindi ambacho Simba SC imeshuhudia watani wao wa jadi, Yanga SC, wakitawala soka la Tanzania kwa kutwaa ubingwa wa Ligi Kuu ya NBC mara tano mfululizo. Pia, Yanga imeweka rekodi ya kuifunga Simba mara sita mfululizo kwenye michezo ya Kariakoo Derby.

Akizungumzia uamuzi wake wa kuchukua hatua, Mo alisema:

“Niliingia kwenye mfumo rasmi mwaka 2017, nikaiongoza Bodi na tukafanikiwa kutwaa ubingwa mara nne mfululizo. Baadaye niliondoka kwa sababu ya majukumu na kutokaa eneo moja muda wote, nikiamini Simba inahitaji mtu wa karibu zaidi. Hata hivyo, baada ya kuona mambo hayajafikiwa kama tulivyotarajia kwa misimu mitatu, nilipata presha kubwa kutoka kwa wanachama na mashabiki, ndipo nikaamua kurejea mwenyewe kuweka mambo sawa.”

Nuru Mpya Msimu wa 2026/27

Licha ya changamoto za hivi karibuni, Mo ameeleza kuwa msimu uliopita Simba ilionyesha ishara thabiti za kurejea kwenye kiwango chake bora.

“Mwaka jana tulikuwa karibu sana. Tulicheza fainali ya CAF na kupoteza ubingwa wa ligi kwa tofauti ndogo ya pointi dhidi ya Yanga katika mechi ya mwisho. Hii inaonyesha uwezo tunao na sasa tumejipanga kufanya makubwa zaidi,” aliongeza Mo.

Kuhusu masuala ya waamuzi na malalamiko ya uendeshaji wa soka nchini, Mo alikiri kuwa zipo changamoto za msingi lakini Simba haitaki kujielekeza huko kwa sasa. Badala yake, nguvu zote zimewekwa kwenye maandalizi kabambe ya msimu mpya ili kurejesha furaha kwa Wekundu wa Msimbazi.