Kocha Yanga Afunguka Sababu ya Kumweka Nje Stephane Aziz Ki

KOCHA Mkuu wa Yanga, Manqoba Mngqithi, amesema kiungo mshambuliaji Stephane Aziz Ki atalazimika kusubiri zaidi kabla ya kuanza kupewa nafasi ya kucheza, akieleza kuwa bado anaendelea kujenga utimamu wake wa mwili (fitness).

Mngqithi ameyasema hayo leo, Jumatano Agosti 19, 2026, wakati akizungumza na waandishi wa habari kuelekea mchezo wao wa Ligi Kuu Tanzania Bara dhidi ya Coastal Union.

Kocha huyo ameeleza kuwa licha ya Aziz Ki kuwa sehemu muhimu ya mipango yake kikosini, bado anahitaji muda zaidi wa kufanya mazoezi ili kufikia kiwango kinachohitajika kabla ya kutumika kwenye mechi za ushindani.

Ameongeza kuwa michezo ya mwanzo ya msimu, hususan mitano ya kwanza, ni muhimu sana kwake katika kulitathmini kikosi na kubaini wachezaji waliotayari kuanza.

“Katika michezo ya mwanzo tunahitaji kuwapa nafasi wachezaji ambao wako tayari kwa sasa. Kila mchezaji anatakiwa kuonyesha uwezo wake ili kupata nafasi,” amesema Mngqithi.

Pia amesisitiza umuhimu wa ushindani wa namba ndani ya kikosi, akiwataka wachezaji wote kupambana ili kujihakikishia nafasi kwenye kikosi cha kwanza. kutokana na mtazamo huo, benchi la ufundi la Yanga halina haraka ya kumrudisha Aziz Ki uwanjani mpaka atakapokuwa tayari kwa asilimia mia moja.

Wito kwa Mashabiki (“Mchezaji wa 12”)

Wakati huohuo, Mngqithi amewataka mashabiki wa Yanga kuendelea kuisapoti timu hiyo kwa nguvu zote kwenye kila mchezo kwani wanachangia kwa kiasi kikubwa ushindi wa timu.

Kocha huyo amewataja mashabiki wa Wananchi kama “mchezaji wa 12” wa Yanga, akibainisha kuwa mchango wao kutoka jukwaani ni chachu kubwa ya kuisukuma timu kupata matokeo mazuri msimu huu.