Clara Luvanga Afunga Bao La Ushindi Marekani, Aandika Historia NWSL
Clara Luvanga ameandika historia mpya kwa soka la Tanzania baada ya kufunga bao lake la kwanza katika Ligi Kuu ya Wanawake Marekani (NWSL) na kuipa Washington Spirit ushindi wa mabao 3-2 dhidi ya Houston Dash.
Mshambuliaji huyo wa Twiga Stars aliingia kipindi cha pili na dakika ya 84 akamaliza kazi baada ya kupokea pasi ya Claudia Martínez, akaingia kwenye eneo la hatari na kumpiga kipa Jane Campbell kwa shuti la mguu wa kulia.
Bao La Dakika 84 Laamua Mchezo
Washington Spirit ilianza kwa bao la Tara Rudd dakika ya 11, lakini Houston Dash ikasawazisha kupitia Miljana Ivanović dakika ya 44. Sofia Cantore aliirudisha Spirit mbele dakika ya 51 kabla Ivanović hajafunga tena dakika ya 59 na kufanya matokeo kuwa 2-2.
Ndipo Clara akaingia kwenye story. Dakika ya 84, Martínez alimpenyezea mpira akiwa anaingia box na Mtanzania huyo hakufanya makosa, akafunga bao la tatu lililodumu hadi mwisho wa mchezo.
Historia Kwa Tanzania
Bao hilo limemfanya Clara kuwa mchezaji wa kwanza kutoka Tanzania kufunga katika NWSL, likija kwenye mechi yake ya pili pekee tangu ajiunge na Washington Spirit kutoka Al-Nassr ya Saudi Arabia.
Katika mechi yake ya kwanza dhidi ya Angel City, Clara aliingia akitokea benchi. Safari hii akapewa nafasi nyingine na akaigeuza kuwa bao la ushindi, kitu ambacho kinaweza kuongeza nafasi yake ya kupewa dakika nyingi zaidi kwenye michezo inayofuata.
Kutoka Mabao 24 Saudi Hadi Marekani
Clara aliwasili Marekani akiwa ametoka msimu mzuri Al-Nassr ambako alimaliza akiwa mfungaji bora wa ligi kwa mabao 24. Hivyo bao hili la kwanza linaanza kuonyesha kwamba instincts zake za kufunga zinaweza kuhamia pia kwenye moja ya ligi zenye ushindani mkubwa zaidi duniani.
Washington Spirit sasa ina pointi muhimu kwenye mbio za playoff, lakini kwa mashabiki wa Tanzania kilichoacha alama zaidi ni kuona jina la Clara likiingia kwenye historia ya NWSL kwa bao ambalo pia limeamua mchezo.
Soma Hapa: Clara Luvanga: Kuvunja Rekodi Ya Dunia Ni Mtihani Mkubwa Washington Spirit
