KOCHA Mkuu wa Ruvu Shooting, Charles Boniface Mkwasa ‘Master’, ameweka rekodi ya kuwa kocha pekee mzawa aliyefanikiwa kukiongoza kikosi kuwa ndani ya nafasi tano za juu kwenye msimamo wa Ligi Kuu Bara.
Pia Mkwasa ni kocha mzawa pekee mzawa aliyefanikiwa kutwaa tuzo ya kocha bora wa mwezi mpaka sasa.
Mkwasa alikiongoza kikosi chake kuibuka na ushindi wa mabao 2-0 dhidi ya Mtibwa Sugar kwenye Uwanja wa Mabatini, Pwani, kabla ya ligi kusimama kwa muda.
Ameiongoza Ruvu kwenye michezo 17 ya ligi msimu huu na kujikusanyia pointi 28 wakiwa kwenye nafasi ya nne.
Nafasi ya kwanza kwenye msimamo ipo mikononi mwa Yanga yenye pointi 44 ikiongozwa na Mrundi, Cedric Kaze, Simba iliyo chini ya Mbelgiji, Sven Vandenbroeck wako katika nafasi ya pili na pointi zao 35.
Azam ya George Lwandamina ipo nafasi ya tatu na pointi zao 32 huku nafasi ya tano ikienda kwa Mkenya Francis Baraza anayeiongoza Biashara United yenye pointi 26.
Mkwasa pia amefanikiwa kutwaa tuzo ya kocha bora wa mwezi Novemba akiwashinda Mecky Maxime wa Kagera Sugar na Fulgence Novatus wa Gwambina alioingia nao fainali hivyo kuwa kocha mzawa pekee aliyefanikiwa kufanya hivyo.
Mkwasa alitwaa tuzo hiyo baada ya kuiongoza Ruvu Shooting kutoka nafasi ya 10 hadi ya nne kwenye msimamo wa ligi.
