HUU SIO MUDA WA KUSHANGILIA HII VITA BADO, AHMED ALLY

MENEJA wa Idara ya Habari na Mawasiliano wa Simba SC, Ahmed Ally amesema timu hiyo imepiga hatua kubwa katika mbio za kuwania ubingwa wa Ligi Kuu Tanzania Bara baada ya kufanikiwa kupunguza tofauti ya pointi kutoka tano hadi mbili dhidi ya vinara wa ligi.

Ahmed amesisitiza kuwa bado kazi kubwa ipo mbele yao kabla ya kufikia malengo ya kutwaa taji hilo.

Amesema kupungua kwa pengo hilo ni jambo la faraja kwa mashabiki na wanachama wa Simba, lakini si muda wa kushangilia kupita kiasi kwa kuwa pointi mbili zilizobaki zina uzito mkubwa katika mbio za ubingwa. Ameeleza kuwa tofauti hiyo inaweza kuwa na mchango mkubwa katika kuamua bingwa wa msimu huu.

Amesema Simba haiwezi kuchukulia hali hiyo kirahisi kutokana na ukweli kwamba timu inayowaongoza ni Yanga SC, wapinzani wao wa jadi wenye uzoefu mkubwa wa kushindania mataji na uwezo wa kuhimili presha ya mbio za ubingwa hadi dakika za mwisho za msimu.

“Kama timu iliyokuwa mbele yetu ingekuwa klabu nyingine kama JKT Tanzania au Azam FC, hali ingeweza kuwa tofauti. Lakini kwa kuwa anayetuongoza ni Yanga, tunapaswa kuwa makini zaidi kutokana na uzoefu wao mkubwa,” amesema Ahmed.

Ahmed amesema Yanga wamekuwa wakikaa kileleni mwa ligi kwa misimu kadhaa mfululizo, jambo linaloonyesha uwezo wao wa kushikilia presha na kusimamia vizuri mbio za ubingwa. Kwa mujibu wa Ahmed, uzoefu huo unawafanya kuwa wapinzani hatari ambao hawawezi kubezwa katika hatua yoyote ya msimu.

Amesisitiza kuwa kwa upande wa Simba, mapambano ya kweli kuelekea ubingwa ndiyo yanaanza rasmi sasa, huku akiwataka wachezaji pamoja na benchi la ufundi kuongeza umakini katika kila mchezo uliobaki ili kuhakikisha hawapotezi alama muhimu.

Ahmed amesema Simba hawana nafasi ya kufanya makosa katika kipindi hiki cha mwisho wa msimu, akieleza kuwa kila pointi itakuwa na mchango mkubwa katika vita ya kusaka ubingwa wa Ligi Kuu Tanzania Bara.