Fei Toto Kurejea Uwanjani: Azam FC Kuikabili Geita Gold Ligi Kuu Bara

Kiungo mchezeshaji hatari wa Tanzania, Feisal Salum ‘Fei Toto’, Ijumaa ya Agosti 28 anatarajiwa kuanza rasmi kampeni zake za Ligi Kuu Tanzania Bara msimu huu, wakati Azam FC itakapokuwa ugenini kuikabili Geita Gold.

Fei Toto alilazimika kukaa nje ya michezo mitatu ya mwanzo ya ligi msimu huu kufuatia adhabu ya kadi nyekundu aliyopata kwenye fainali ya Kombe la Shirikisho la CRDB dhidi ya Simba SC, iliyochezwa visiwani Pemba. Kukosekana kwa kiungo huyo mchezeshaji kulionekana pengo kubwa, licha ya kikosi cha Azam FC kupambana kusaka matokeo mazuri.

Baada ya kumaliza adhabu hiyo, Fei Toto amerejea kikamilifu kwenye mipango ya Kocha Mkuu Florent Ibenge na anatarajiwa kuwepo kikosini dhidi ya Geita Gold.

Kwa misimu mitatu mfululizo, Fei Toto amekuwa akitambuliwa kama mmoja wa viungo bora zaidi nchini, huku kiwango chake kikitia hamasa klabu kongwe za Simba na Yanga kumnyatia katika kila dirisha la usajili. Kurejea kwake kunatoa nguvu mpya kwenye safu ya usambazaji na ushambuliaji ya Azam FC katika vita ya kuwania ubingwa wa Ligi Kuu Bara.