Michezo Bongo

Vita ya Pointi Tisa! Raundi ya Ligi Kuu Bara Kuunguruma Leo Jumamosi

Vardo August 29, 2026 9:52 am

Msisimko wa Ligi Kuu Bara unaendelea leo Jumamosi kwa mechi tatu za kukata na shoka, ambapo timu sita zitakuwa viwanjani kusaka pointi tatu muhimu za kujiweka kwenye nafasi nzuri katika msimamo wa ligi.

TRA United vs Dodoma Jiji (Saa 10:00 Jioni – Arusha)

Vita ya kusaka ushindi wa kwanza msimu hii itaanza jijini Arusha. Timu zote mbili zinaingia uwanjani zikiwa hazijapata ushindi wowote kwenye michezo yao mitatu ya kwanza:

TRA United: Inarudi nyumbani ikiwa na pointi 2 baada ya sare mbili ugenini dhidi ya JKT Tanzania (1-1) na Coastal Union (1-1), pamoja na kupoteza dhidi ya Azam FC (2-1). Licha ya kuruhusu mabao 4, TRA imefanikiwa kufunga katika kila mchezo.
Dodoma Jiji: Imeanza msimu vibaya ikiwa na pointi 1 pekee (sare ya 1-1 dhidi ya Pamba Jiji) kabla ya kupoteza dhidi ya Mbeya City na Polisi Tanzania bila kufunga bao.

Kocha wa TRA United, Etienne Ndayiragije: “Tumerudi nyumbani tukiwa na akili moja tu ya kutafuta ushindi wa kwanza. Wachezaji wamepambana ugenini, sasa ni wakati wa kutumia uwanja wa nyumbani kuanza kukusanya pointi tatu.”

Kocha wa Dodoma Jiji, Vincent Mashami: “Hatustahili matokeo tunayoyapata hivi sasa. Tunahitaji kubadilika haraka na tuna lengo moja tu leo—kutafuta ushindi ingawa tunajua TRA ni timu nzuri.”

Singida Black Stars vs Polisi Tanzania (Saa 12:30 Jioni – Singida)

Wenyeji Singida Black Stars watakuwa nyumbani kujaribu kurudi kwenye mstari baada ya kuonja kipigo chao cha kwanza cha msimu (2-1 dhidi ya Simba SC).

Singida BS: Imeshinda mechi moja (3-0 dhidi ya Fountain Gate), ikapata sare na Kagera Sugar (1-1), na kupoteza dhidi ya Simba. Safu yao ya ushambuliaji ni kali ikiwa imefunga mabao 5 kwenye mechi 3.
Polisi Tanzania: Wamerudi Ligi Kuu kwa kishindo kikubwa! Wakiwa na pointi 7, wametoka sare na Azam FC (1-1) kabla ya kuzichapa JKT Tanzania (2-0) na Dodoma Jiji, huku wakilinda lango lao bila kuruhusu bao kwenye mechi mbili za mwisho.

Kocha wa Singida BS, Pappy Kimoto: “Tuliheshimu ubora wa Simba lakini sasa umewadia wakati wa kubadilisha matokeo na kurudi kwenye ushindi mbele ya mashabiki wetu.”

Kocha wa Polisi Tanzania, Mbwana Makata: “Haitakuwa mechi rahisi lakini morali ya wachezaji wangu ipo juu sana. Tutakwenda kutumia ubora wetu kushindana na timu yenye wachezaji wazuri.”

JKT Tanzania vs Namungo FC (Saa 3:00 Usiku – Meja Jenerali Isamuhyo)

Mchezo wa mwisho wa siku utapigwa usiku ambapo JKT Tanzania itakuwa nyumbani kuikabili Namungo FC. JKT Tanzania inasaka matokeo ya kurekebisha makosa baada ya kuanza msimu vibaya kwa kupata sare ya 1-1 na TRA Utd, kabla ya kupokea vipigo kutoka kwa Polisi Tanzania (2-0) na bingwa mtetezi Yanga SC (4-0).