Mngqithi Atoa Onyo Uzito Yanga: “Nafasi 20 Hazitoshi, Tunapaswa Kuwa Wajihi”
KOCHA Mkuu wa Yanga, Manqoba Mngqithi, ameweka wazi kuwa kikosi chake kinahitaji maboresho ya haraka katika eneo la umaliziaji, akionya kuwa kushindwa kutumia nafasi nyingi wanazotengeneza kunaweza kuwagharimu katika hatua muhimu za msimu.
Yanga inashuka dimbani leo Jumatano kwenye Uwanja wa KMC Complex ikiwa mwenyeji wa Geita Gold FC, katika mchezo wa Ligi Kuu Tanzania Bara utakaopigwa majira ya saa 1:00 usiku.
Kuelekea pambano hilo, Mngqithi ameeleza kuwa benchi la ufundi limefanyia kazi mapungufu ya safu ya ushambuliaji baada ya kubaini timu hiyo inapoteza nafasi nyingi za wazi.
“Bado tunahitaji kuboresha eneo letu la umaliziaji. Tunatengeneza karibu nafasi 20 kwa kila mchezo, lakini idadi ya mabao tunayofunga haiendani na fursa tunazotengeneza,” alisema Mngqithi.
Kocha huyo aliongeza kuwa ingawa Yanga imekuwa ikipata matokeo mazuri na kufunga mabao katika mechi zilizopita, kiwango cha nafasi wanazozipoteza kinapaswa kuchukuliwa kama tahadhari kubwa, hasa kuelekea mechi ngumu za ndani na kimataifa.
Akisisitiza hilo, alisema kwenye michuano ya Ligi ya Mabingwa Afrika timu inaweza kupata nafasi chache sana dhidi ya wapinzani wenye uwezo mkubwa, hivyo kutozitumia vizuri ni kujitafutia matatizo.
Akiwazungumzia wapinzani wao Geita Gold, Mngqithi aliwasifu kwa kuwa na wachezaji wenye uwezo binafsi na ushirikiano mzuri kama timu, lakini akabainisha kuwa Yanga imejipanga kuingia kivingine ili kutumia udhaifu wao na kuondoka na pointi tatu.
Kuhusu kikosi kitakachoanza, Mngqithi alisema ni mapema kukitaja kutokana na muda mfupi wa maandalizi tangu mchezo uliopita, huku baadhi ya wachezaji wakihitaji kufanyiwa tathmini ya kiafya kutokana na uchovu na maumivu madogo.
Hata hivyo, alihitimisha kwa kueleza kuwa hahisi presha yoyote kwani Yanga ipo kwenye mwelekeo mzuri alioutarajia, akizingatia kuwa msimu bado ni mrefu na hawajakutana na wapinzani wote wakubwa.
Yanga inarejea kwenye mechi za Ligi Kuu baada ya kufanya kweli katika Ligi ya Mabingwa Afrika kwa kuiondoa Gaborone United kwa jumla ya mabao 3-2, na sasa inalenga kuendeleza wimbi la ushindi nyumbani.
