Kikosi Cha Yanga Chaleta Hasira: Simon Dladla Atoa Ahadi Nzito Dhidi ya Mashujaa FC!
Kocha wa muda wa Yanga, Simon Dladla, amekiri wazi kuwa timu hiyo ina deni kubwa kwa mashabiki wake la kufunga mabao, kucheza soka la kuvutia, na kuonyesha ushindani wa hali ya juu. Ameahidi kufanya maboresho makubwa yatakayorejesha furaha kwa Wananchi katika mchezo ujao wa Ligi Kuu Tanzania Bara dhidi ya Mashujaa FC kesho kwenye Uwanja wa KMC Complex.
Yanga inashuka uwanjani huku ikitambua mapungufu yaliyojitokeza katika mchezo uliopita, ambayo benchi la ufundi limesema yamefanyiwa kazi ili kuhakikisha wanavuna alama zote tatu na kurejea kwenye kasi ya kuwania ubingwa.
“Kwa Wananchi, tunafahamu kuwa tuliwakatisha tamaa mchezo uliopita. Tunadaiwa magoli, tunadaiwa soka zuri na kiwango cha juu cha ushindani kila tunaposhuka uwanjani. Tumeyatambua mapungufu yetu na tutapambana kurejesha tabasamu lao,” alisema Dladla.
Akizungumzia mbinu za mchezo huo, kocha huyo alieleza kuwa mabadiliko ya kimfumo yatategemea hali ya wachezaji watakaokuwa tayari, huku akisisitiza umuhimu wa kutumia vyema uwanja wa nyumbani kwa kuwa wakali na wenye maamuzi ya haraka mbele ya lango la wapinzani.
Dladla amewasihi mashabiki na wanachama wa Yanga SC kujitokeza kwa wingi kutoa sapoti katika kipindi hiki cha mabadiliko, akisisitiza kuwa ushirikiano wao ni nguzo kuu kuelekea ushindi.
