LEO, Juni 17 Uwanja wa Jamhuri, Dodoma wanaume 22 JKT Tanzania na Yanga watakuwa kazini kuzisaka pointi tatu muhimu huku rekodi zikiibeba Yanga mbele ya wapinzani hao.
JKT Tanzania iliyo chini ya Kocha Mkuu, Abdalah Mohamed,’Bares’ ilipanda daraja msimu wa 2018/19 na imekutana na Yanga ndani ya mechi za Ligi Kuu Bara mara tatu.
Kwenye jumla ya mechi tatu walizocheza ambazo ni dakika 270, JKT Tanzania haijaambulia pointi mbele ya Yanga zaidi ya kuyeyusha pointi zote tisa.
Yanga imeifunga JKT Tanzania, jumla ya mabao saba huku JKT Tanzania ikifunga mabao mawili ndani ya mechi zote walizokutana baada ya kupanda daraja.
Matokeo yao yalikuwa namna hii:-Novemba 29, Uwanja wa Taifa, Yanga 3-0 JKT Tanzania. Februari 10, JKT Tanzania 0-1 Yanga, Mkwakwani na msimu huu wa 2019/20, Uwanja wa Uhuru, Yanga ilishinda mabao 3-2.
Wakati wakipoteza Uwanja wa Uhuru, Patrick Sibomana aliwaliza JKT Tanzania dakika ya 10 na bao la pili lilipachikwa na Juma Balinya na msumari wa tatu ulipachikwa na David Molinga.
Yale ya upande wa JKT Tanzania yaliandikwa na Adam Adam dakika ya 13 na Danny Lyanga.
